Парчами Тоҷикистон нишонаи истиқлолияти Ҷумҳурии Тоҷикистон буда, 24 ноябри соли 1992 қабул карда шудааст. Он аз се ранг: сурх, сафед ва сабз иборат аст. Дар байни парчам тоҷ ва ҳафт ситора бо ранги тиллоӣ ҷо гирифтаанд. Ранги сурх рамзи озодӣ, сафед – оромӣ ва сабз – ободӣ мебошад. Тоҷ ва ҳафт ситора нишони озодӣ ва истиқлолияти давлатии Чумҳурии Тоҷикистон мебошад.Дар Бадахшон то имрӯз ранги сурх нишони хушбахтӣ, хушҳолӣ ва некӯаҳволӣ, сафед–
нишони покӣ ва рӯшанӣ, сабз бошад, нишони ҷавонӣ ва шукуфоӣ аст. Дар замонҳои Зардушт бошад, ранги сурх нишони ҷасорат ва худфидоӣ, сафед– маънавиёт, покӣ ва муқаддасот, сабз нишони табиат, ҷавонӣ ва шукуфоӣ аст. Ба андешаи М. Ревнивтсева тоҷи дар парчами Тоҷикистонбуда се маънои оташи муқаддасро дорад. Элементи марказии тоҷ нишони кӯҳи ҷаҳонии Хара аст, ки дар маркази дунё қарор дорад. Қавсайни тиллоии (дуга) қисмати поёнии эмблема рамзи «пули сирот» (ба забони
паҳлавӣ – Чинват) аст. Ба андешаи ин донишманд ҳафт ситораи тиллоӣ рамзи яке аз фаҳмишҳои муҳими зардуштӣ, яъне ҳафт рӯҳи меҳрубони Амеша Спента, яке аз наздикони Аҳурамаздо мебошад.Ба андешаи олими рус, В. Саприков бошад, ранги сурхи парчам рамзи офтоб, ғалаба ва музаффарият, ранги сафед рамзи покии маънавии мардум, барф ва кӯҳҳои сарбаланди кишвар аст, ки 93 дар сади сарзамини ҷумҳуриро ташкил менамояд. Ва тақрибан нисфи ин сарзамин дар баландии 3000 метр ҷойгир аст. Ҳамин тавр, ранги сафед ифодагари махсусиятҳои табиати ҷумҳурии Тоҷикистон мебошад. Ранги сабз рамзи моҳияти маънавии ислом аст. Ҳамзамон ранги сабз нишони Наврӯзи оламафрӯз ҳам мебошад.
Таҳияи Фароруни Сабзқадам