Раъно азизи дидҳо

Тавсифи Раъноро ҳамчун бонуи фидоӣ дар кору вазифаи хеш аз бисёриҳо шунида будам. Суҳбати чандлаҳзаина аз боби корҳои анҷомдода ва нақшаҳои доштааш, баҳои ҳамкорону наздиконашро бори дигар бароям равшан кард.

Аз дафтари хотира

– Дар ҷавонӣ кас чӣ орзуҳое надорад. Ман ҳам орзуи табиб шуданро доштам, духтуре, ки сидқан ба дарди инсонҳо расидагӣ кунад. Аз ин хубтар он буд, ки падар орзуҳоямро об медод, ӯ ҳам мехост, ки маро рӯзе табиб бинаду ифтихор аз духтари хеш кунад. Танҳо табиби соҳибиззат, табибе, ки дар кору ҳунари хеш дастболо бошам. Аммо афсӯс, ки соле мактабро хатм мекардам, моҳи августи соли 1996 падар аз олам даргузашту ману орзуҳои ҷавонӣ дар нимароҳ мондем.

Оилаи шашнафараи мо умеду муттакоеро аз даст дод, ки нонбиёри хона буд. Ноилоҷ ба курси яксолаи муаллимтайёркунии ноҳия даромада, таҳсили баъди мактабиро он ҷо идома додам. Хушбахтона, бо фарҷоми он, соли 1997 бо ташаббус ва нигоҳи хайрхоҳонаи Президенти маҳбубамон муҳтарам Эмомалӣ Раҳмон ҷиҳати дастгирии духтарони деҳот квотаи Президент таъсис ёфт, ки бо дарёфти ин хабар хушбахтии деринтизор маро фарогир шуд, – оғоз намуд суҳбатро Раънобону.

Аввалин духтарҳои Президент

Тибқи квота вай донишҷӯи Донишгоҳи аграрии Тоҷикистон ба номи Шириншоҳ Шоҳтемур шуда, соли 2001 бо ихтисоси агроном онро хатм намуд. Соле чанд дар Вазорати фарҳанги ҷумҳурӣ ва Маҷлиси намояндагони кишвар мутахассис ва сармутахассиси бахшҳои гуногун шуда кор кард.

Соли 2015 Мақомоти иҷроияи маҳаллии ҳокимияти давлатии ноҳияи Файзобод барои Раъно Давлатова ҳамчун духтари болаёқат ҷойи кори муносиб пешниҳод намуд, ки бо гузаштан аз озмуни хизматчиёни давлатӣ мутахассиси бахши кор бо занон ва оилаи назди мақомот таъин гардид. Аз рӯзҳои аввал ба яке аз фаъолзанҳои ноҳия Нозукой Шоазизова, ки солҳо дар вазифаҳои раиси деҳот, муовини раиси ноҳия, муовини аввал ва иҷрокунандаи вазифаи раиси ноҳия кор кардааст, такя менамуд. Барои кумак ва дастгирӣ аз ӯ маслиҳат мепурсид. Нозукой ҳам (равонаш шод бод), аз зумраи бонувоне буд, ки мехост духтарони маҳаллӣ рушд кунанд, фаъол бошанд, дар ҳама самтҳои фаъолият нақши онҳоро дидан мехост.

Имрӯзҳо Раънобону айни ҳамин масъулият ва ҳамин андешаҳоро ба сар дорад. Аз пешравӣ ва қомат афроштани духтарони маҳал курта-курта гӯшт мегирад, барои дастгирии онҳо имконот фароҳам меорад. Ин аст, ки ҳини суҳбати мо бонувони солдидаю кордида ҳам бо эҳтиром дарашро мекӯфтанду ҷавондухтарони навкор ҳам. Яке ӯро духтари Президент унвон медоду дигаре мушкилкушои бонувон, сеюмӣ раънои дилҳо.

– Воқеан, Раъно ба дилу дидаи занҳои Файзобод роҳ ёфтааст, – гуфт дар суҳбати сарироҳӣ раиси Шурои собиқадорони меҳнат Искандар Каримов, ки ба қавли ӯ Раъноро рӯзҳои истироҳат низ дар оғӯши модарону хоҳарон дидан мумкин аст.

Даҳ солу боз солҳои дигар

Инак, соли даҳум аст, ки бонуи фаъолу корозмуда дар бахши кор бо занон ва оилаи МИМҲД ноҳияи Файзобод кор мекунад. Чор соли охир Раъно Давлатова дар вазифаи мудири бахш фаъолият дорад ва кӯшиш менамояд, то ба ҳар бонуи хонашину коргарзан, ки наздик ба панҷоҳ дарсади аҳолии ноҳияро ташкил медиҳанд, расидагӣ кунад.

– Тайи солҳои охир дар аксари соҳаҳои хоҷагии халқ саҳми бонувон афзуда истодааст, – ишора ба соҳаҳои иҷтимоӣ, хусусан маорифу тандурустӣ менамояд Раъно Давлатова.

Дар муассисаҳои буҷетии ноҳия 1740 бону фаъолият доранд, ки аксаран соҳибмаълумот ва соҳибтахассус буда, барои духтарони синни мактабӣ ва занҳои хонашин намунаи коргарзанҳои фаъол арзёбӣ мешаванд. Соҳаи маориф яке аз соҳаҳои афзалиятноки ноҳия буда, дар муассисаҳои таълимӣ 30 ҳазору 131 фарзанди халқ, минҷумла 14 ҳазору 866 духтар таҳсил мекунад, ки ба онҳо 1716 омӯзгор таълиму тарбия медиҳад. Аз шумори 972 омӯзгорбону 17 нафар дар вазифаҳои роҳбарикунандаи муассисаҳо фаъолият доранд.

Соли 2025 барои кормандони соҳаи тандурустии ноҳияи Файзобод соли бобарору хотирмон буд. Пас аз корҳои сохтмонӣ ва таъмиру тармими сесола бинои нави сеқабата бо тарҳи ҳозиразамон ва муҷаҳҳаз бо таҷҳизоти тиббӣ барои ҳамаи шуъбаҳои бемористон мавриди истифода қарор гирифт. Бинои нав аз шуъбаҳои қабул, ҷарроҳӣ ва ташхису эҳё, инчунин, маҷлисгоҳи барҳаво иборат мебошад. Аз шумори 320 корманди беморхона 247 нафарро занон ташкил медиҳанд, ки миёни ҳайати тиббӣ 3 бону роҳбар аст.

Дар корхонаҳои парандапарварии ноҳия, бо истеҳсоли 175 ҳазор дона тухм дар як шабонарӯз ва корхонаи «Оби маъдани Файзобод» низ қисми зиёди кормандонро занону духтарон ташкил медиҳанд, ки онҳо низ бо саҳмгузории хеш баробари мардон рушди устувори саноату иқтисодиётро таъмин мекунанд.

– Бахшида ба истиқболи Ҷашни 35-солагии Истиқлоли давлатӣ дар ҳудуди ноҳия сохтмони 278 иншооти гуногун ба нақша гирифта шуда буд, ки алъон 225 адади он ба истифода дода шуд ва садҳо ҷойи кор барои бонувони маҳаллӣ пайдо шуданд, – меафзояд ҳамсуҳбатам.

Зан – маҳзари покизагӣ

Аксияи «Зан – маҳзари покизагӣ», ки бо шуруи баҳори имсола, аз 1 то 31-уми март идома дошт, беҳтарин намунаи ташаббусҳои бонуи сарвар аст, ки тамоми занону духтарони маркази ноҳия ва деҳотро ба тозагию поккории хонаву дари худ, ташкилоту муассисаҳо ва кӯчаву роҳравҳо ҷалб сохт. Дар баробари тозаю озодакориҳо бонувони коргару хонашин рӯзҳои шанбе ҳазорҳо бех гулу ниҳол шинонда, табиати атрофро ҳусни нав бахшиданд. Дур будан аз бегонапарастӣ ва тақлиди кӯркӯрона ба фарҳанги ғайр дар маркази таваҷҷуҳ ва аз самтҳои асосии фаъолияти бонуи ҷавон аст, ки якҷоя бо намояндаҳои бахши танзим ва аъзои Шурои занони ноҳия аз тамоми марказҳои савдо дидан намуда, бо занону духтарони фурӯшанда суҳбатҳои муфид доир менамояд. Аз ибтидои сол дар муассисаҳои миёнаи умумӣ ва шаҳраку деҳкадаҳо бо иштироки фаъолзанҳо ва модарони рӯзгордида суҳбату вохӯриҳои бахши занон доир шуд, ки иштироки беш аз 8000 сокини ноҳияро дар бар гирифт.

– Чорабинии маърифатӣ–фарҳангии «Деҳа ба деҳа», ки бахши кор бо занон ва оила роҳандозӣ менамояд, занону духтарон, хусусан оилаҳои ҷавонро бо одоби рӯзгордорӣ, намунаи хӯрокҳои миллӣ ва самаранок истифода бурдани заминҳои наздиҳавлигӣ талқин менамояд, – ишора ба расму овезаҳои ҳуҷраи кориаш мекунад бону. Қисми охирро низ омода мекунам, ки аз ҷумлаи «Бонувони соҳибмаърифати ноҳия…» оғоз шуда, то охири мақола идома меёбад.

Бонувони соҳибмаърифати ноҳия бинобар хулқи наку ва таҷрибаи хуби корӣ ӯро ситоиш мекунанд. Раъно аз зумраи роҳбарзаноне аст, ки дониш ва малакаи худро пайваста такмил медиҳад.

Соли 2020 Донишгоҳи миллии Тоҷикистонро бо ихтисоси филологияи тоҷик ғоибона хатм намуд. Бахши занони ноҳияро роҳбарӣ намуда, инчунин, солҳост, ки дар яке аз мактабҳои маркази ноҳия аз фанни «Маърифати оиладорӣ» барои духтарони хатмкунанда одобу муошират меомӯзад. Дар мизҳои мудаввар бахшида ба мавзӯъҳои «Терроризм ва экстремизм, хатари ҷомеаи ҷаҳон», «Нест бод экстремизм», «Мо бар зидди экстремизм» ва «Савдои одамон» аз ровиёни асосӣ буда, ҳамчунин, тавассути нашрияи маҳаллӣ ва садову симои ҷумҳурӣ андешаҳои худро оид ба мавзӯи рӯз ва дигар мушкилот пайваста иброз медорад.

Доимо миёни бонувони маҳал будани Раъно Давлатова на танҳо ӯро азизи дилҳои мардум кардааст, ҳамчунин, пешравии бонувонро дар ҳама самтҳои хоҷагии халқи ноҳия таъмин намудааст. Бо хатми соли хониш садҳо духтарони маҳаллӣ сафи донишҷӯёнро дар муассисаҳои олии кишвар пур мекунанд. Шумори бонувони мутахассис ва занони роҳбар дар ташкилоту муассисаҳо ҳамасола меафзояду пошхӯрии оилаҳо дар деҳот коҳиш меёбад, ки ин ҳама азми ӯро ба фаъолияти минбаъда дучанд мекунад. Мақомоти иҷроияи маҳаллии ҳокимияти давлатии ноҳия низ бо Раъно барин дастпарварони квотаи Президент ифтихор мекунанд.

Рустами НАЗИР,

Душанбе – Файзобод – Душанбе