Эмомалӣ Раҳмон: “Ба пеш ҳаракат намо”

-Сӯйи қуллаи осмонбӯсу нуқрафом ҳаракат кардан, таровати зебоии табиатро эҳсос намудан, бас заҳматталаб, ҳамзамон, ширину гуворост, - баён дошт Дилором Ҷалолова.

Аз нафарони хушбахтам, ки дидани чандин пиряхҳои олам насибам шудааст. Баробари ин, дар чанд конфронси байналмилалӣ вобаста ба муаммои пиряхҳо, аз ҷумла «Занон ва пиряхҳо» иштирок кардаам. Дар маркази пиряхшиносии Академияи миллии илмҳои Тоҷикистон ҳамчун ходими илмӣ фаъолият дошта, таҳқиқоти илмӣ анҷом медиҳам. Ҳоло пайванди риштаи илмӣ дар мавзуи пиряхҳо ҳастам. Мавзуи пирях ва пиряхшиносӣ бароям ошнову хеле ҷолиб аст. Шоистаи пазироист, ки ин масоили мубрами ҷаҳонӣ зери таваҷҷуҳи Пешвои муаззами миллат муҳтарам Эмомалӣ Раҳмон қарор дорад. Ин аст, ки дар конфронси байналмилалии шаҳри Душанбе пешниҳоди Сарвари давлат дар мавриди нигаҳдошту ҳифзи пиряхҳо аз ҷониби аҳли конфронс ва ҷомеаи ҷаҳонӣ хуш пазируфта шуд. Албатта, бардошти ин масъалаи мубрам саривақтӣ аст. Дар ҳолати дастаҷамъона пешгирии обшавии босуръати пиряхҳо имкони ҳифзу нигаҳдошти онҳо даст хоҳад дод,- иброз намуд Дилором.

Дилором Ҷалолова аз зумраи фидоиёни соҳаи маориф, таълиму тарбияи насли наврас, омӯзгори дараҷаи олӣ, Аълочии маориф ва илми Ҷумҳурии Тоҷикистон, директори Муассисаи таълимии давлатии махсусгардонидашудаи хонандагони болаёқати деҳоти Хистеварзи ноҳияи Бобоҷон Ғафуров мебошад.

Ӯро ҳамчун омӯзгори ҷавону умедбахш, навҷӯю навовар, муваффақу комёб, роҳбари ботаҷрибаву чашмикордон ва модари меҳрубон мешиносанду бо самимияти хосаю арҷгузорӣ номаш ба забон мегиранд. Ба майдони пурмасъулияту пуршарафи омӯзгорӣ омаданаш пешниҳоду раҳнамоии бародараш аст…

Дар наврасӣ донаи умеди духтур шуданро бо меҳр дар қалбаш мепарварид, аммо фавти ногаҳонии падару модар дар як фосилаи кӯтоҳи вақт чархи орзуро сӯйи дигар тофт. Дилором дар оила фарзанди хурдӣ буд. Боз хоҳару бародар дошт. Бибикалонаш бо меҳр онҳоро ба тарбияи худ гирифт, кӯшид, то фазои талафи меҳру муҳаббати пайвандонро набераҳояш камтар эҳсос кунанд, барои онҳо ҳар амали неке аз дасташ омад, анҷом дод. Барвақт маҳрум шудан аз оғӯши гарми падару модар дар камолоти Дилором ва хоҳару бародараш бетаъсир намонд, вале онҳо кӯшиданд бо андӯхтани дониш, касбу амали нек номи волидони азизашонро зинда доранд. Бародараш дар пайравии падар пешаи дандонпизишкиро интихоб кард, хоҳараш аз пайи омӯзгорӣ рафт. Дилором бошад, бо маслиҳати бародараш факултети химия ва биологияи Донишгоҳи давлатии Хуҷанд ба номи академик Бобоҷон Ғафуровро интихоб кард, бо дипломи сурх ва бо сари баланд Донишгоҳро хатм намуд.

Бо гузашти сол шуълаи умед қалби Дилоромро гармӣ бахшид. Ҳаёти рангин, зиндагии пурфасона думболагираш шуд. Бо ҷавони хушфеълу соҳибмаълумоти деҳа пайванди муҳаббати хонаводагӣ баст. Қадам бо умед ба остонаи бахт гузошт. Баъди дувоздаҳ соли таҳаммулу сабру интизорӣ соҳиби гулдухтар гардиданд. Накҳати зиндагиро дар канори оила хушу хуррамона дарёфт. Бо сарфарозӣ аз ин бахти нек ҳоло гулҳои мақсуду умедро аз домони муҳаббат мечинад.

Фаъолияти меҳнатиро Дилором Ҷалолова дар Муассисаи таълимии давлатии махсусгардонидашудаи хонандагони болаёқати деҳоти Хистеварзи ноҳияи Бобоҷон Ғафуров ба ҳайси омӯзгори фанни биология оғоз бахшид. Бо иродаву азми қавӣ донишу маърифат, маҳорату малака, дар ниҳоят меҳру муҳаббати худро дар таълиму тадрис ва тарбияи шогирдон дареғ надошт. Ана ҳамин заҳмати дучанду содиқона ва бо камоли масъулиятшиносӣ кор карданаш буд, ки моҳи августи соли 2022 вазифаи директории ин муассисаи бонуфузу пешқадами ноҳияро ба дӯшаш гузоштанд. Дар аввал мушкилӣ мекашид. Бо сабурӣ ва дарёфти роҳи кушоишу пешрафт бо истифодаи лаёқату дониши фарох ва нигоҳи наву дурбинона тавонист муроди дил ҳосил намояду барои беҳтар гардидани сатҳу сифати таълиму тарбия дар таълимгоҳ ноил гардад. Ҳамасола шогирдонаш дар озмуну олимпиадаҳои ҷумҳуриявию байналмилалӣ шарафи ғолибиятро соҳиб мешаванд. Пирӯзиву комёбии онҳо барои фаъолияти минбаъдааш неруву илҳоми тоза зам менамоянд.

Омӯзгориро Дилором Ҷалолова ба худ «ишқ» хонда, бо муҳаббати камназир, дилбастагии зиёд ба ин касби пурифтихор бо навоварию навҷӯӣ фаъолияти пурсамар дорад. Комёбӣ дар озмуни бонуфузи «Омӯзгори соли Тоҷикистон-2024» натиҷаи ин ҳама ранҷу заҳматҳои ширинаш аст.

-Бори аввал соли 2020 дар озмуни «Омӯзгори соли Тоҷикистон» бо омодагӣ иштироку заковатсанҷӣ намуда, дар даври ниҳоӣ мақоми дуюмро соҳиб шудам. Домони умед дубора маро ба майдони мусобиқа овард, то боз маҳоратсанҷӣ намоям. Бо бардошти таҷриба ва омодагии ҷиддӣ маротибаи дуюм дар озмуни касбӣ иштирок карда, ниҳоят унвони «Омӯзгори соли Тоҷикистон-2024»- ро шарафёб шудам,-ёдовар мешавад бону Дилором ва илова мекунад: Рӯзи пурнишоту беҳтарину хотирмон бароям ин лаҳзаи соли 2022 гирифтани Ҷоизаи давлатии барои омӯзгорон ва олимони ҷавони фанҳои табиатшиносӣ, дақиқ ва риёзӣ аз дасти мубораки Пешвои муаззами миллат муҳтарам Эмомалӣ Раҳмон аст. Он вақт падарвор насиҳатам карданду гуфтанд: «Духтарҷон, ман ба ту сарбаландӣ мехоҳам. Ҳамеша ба пеш ҳаракат намо!». Бо шунидани ин суханҳо қувваю ирода, меҳру муҳаббат ва майлу рағбатам ба пешаи омӯзгорӣ боз ҳам афзуд. Дар ҷавоб қавл додам, ки то ҷон дар тан дорам, содиқонаву софдилона ин рисолати худро сарбаландона анҷом медиҳам…

Як хислати наҷиби Дилором Ҷалолова он аст, ки аз кори ба анҷомрасондаи худ қаноатаманд буда наметавонад. Барои комёбиҳои дигар кӯшишу талош мекунад, то боз ҳам пешрав бошад. Бо бардошти таҷриба, донишу ҷаҳонбинӣ, малакаву маҳорати касбӣ барои рушди соҳаи маориф ҳамчун як ҷавони зодаи даврони истиқлол саҳми шоиста гузорад, то аз меваи ба даст овардааш шаҳди зафар бичашад…

                                                       Муслима РАҲИМОВА,                 

                                                    ноҳияи Бобоҷон Ғафуров