“ПАПИРУС” – иқтидори бузурги содиротӣ

Пас аз эълон гардидани саноатикунонии босуръати кишвар ҳамчун ҳадафи чоруми миллӣ чанд барномаю стратегияҳои давлатӣ дар ин самт тасдиқ гардида, таҳия ва татбиқу амалигардонии онҳо имкон фароҳам овард, ки шумори корхонаҳои саноатӣ дар мамлакат сол аз сол афзуда, ҳиссаи онҳо дар маҷмуи маҳсулоти дохилӣ ба таври назаррас боло равад. Бо назардошти муҳимияти ин соҳаи калидии иқтисоди давлат, масъалаҳои бо ҷойи кор таъмин гардидани аҳолӣ, дарёфти музди меҳнати кофӣ ва баланд шудани некуаҳволии мардум тадриҷан ҳалли худро меёбанд.

Ин аст, ки ҳоло дар шаҳри Хуҷанд теъдоди корхонаҳои саноатӣ ба таври бесобиқа меафзояд. Яке аз чунин коргоҳе, ки иқтидори зиёди содиротӣ дошта, бозори дохилиро низ бо маҳсулоти босифат таъмин месозад, корхонаи коркарди коғаз ва истеҳсоли маҳсулоти полиграфии Ҷамъияти дорои масъулияти маҳдуди “Папирус” аст, ки аз ҷониби соҳибкори маҳаллӣ бунёд ёфтааст.

Ин коргоҳ дар минтақаи саноатии шимолу шарқӣ, дар маҳаллаи Темурмалики шаҳри Хуҷанд воқеъ аст. Ин коргоҳи бузург бо назардошти талаботи замони муосир дар масоҳати яку ним гектар замин бунёд ёфта, ҳамчунин, чанд иншооти ёрирасон дорад. Бунёди коргоҳ соли 2022 шуруъ гардида, моҳи июли соли 2023 бо иштироки Сарвари давлат муҳтарам Эмомалӣ Раҳмон мавриди баҳрабардорӣ қарор гирифт. Дар ин макон коркарди коғаз ва истеҳсоли дафтарҳои мактабӣ, фаннӣ, корӣ ва албом ба роҳ монда шудааст. Корхона дорои хатти муосири истеҳсолӣ буда, аз рӯйи меъёрҳои байналмилалӣ фаъолият менамояд. Ин имкон фароҳам меорад, ки сифати маҳсулот ҳамаҷониба таъмин гардад. Маҳсулот ивазкунандаи воридот маҳсуб ёфта, барои содирот низ пешбинӣ шудааст.

-Соли 2024 коргоҳ аз ҳисоби фурӯши маҳсулот 93 миллион сомонӣ даромад ба даст овард. Кӯшиш дорем, ки имсол хатти истеҳсолиро васеъ намуда, аз ин бештар маҳсулот тавлид намоем. Соли 2024 бо дастгирии ҶСК “Бонки Эсхата” ба мо 500 ҳазор доллари ИМА ҷудо гардид, ки бо ин роҳ ду хатти истеҳсолӣ аз Ҷумҳурии Мардумии Чин харидорӣ ва насб кардем, ки ба ин тариқ, иқтидори содиротии корхона зиёд гардид. Ҳоло 70 дарсади маҳсулот ба Ҷумҳурии Қазоқистон содирот мегардад ва боқӣ ба бозорҳои ҷумҳурӣ ворид мешавад. Бартарият дар он аст, ки коргоҳ дар шоҳроҳи Душанбе – Хуҷанд қарор дорад ва харидорон маҳсулотро ба осонӣ яклухт мехаранд, - иброз дошт корманди коргоҳ Абдуллоҷон Аҳмадҷонов.

Ба иқрори ӯ, танҳо моҳи майи соли равон ба маблағи 6 миллион сомонӣ маҳсулотро ба Қазоқистон интиқол доданд. Ҳоло иқтидори истеҳсолии корхона то 5 – 6 миллион нусха дафтар дар як моҳро фаро мегирад.

- Маҳсулоти асосии коргоҳро дафтарҳои иборат аз 12 - 24 варақ, дафтарҳои фаннии 36, 48 ва 96-варақӣ, албомҳо барои расмкашӣ ва дафтарҳои кории ҳаҷми А4 дар бар мегиранд. Бо хоҳиши фармоишгарон метавонем истеҳсоли дафтарчаи қайдҳоро ба роҳ монем. Дар коргоҳ тарроҳ (дизайнер) дорем, ки мувофиқи хостаҳои мизоҷон тарҳи маҳсулотро омода месозад ва ба муштарӣ амали ӯ писанд ояд, ба тавлиди дафтарчаҳо мепардозем, - афзуд А. Аҳмадҷонов.

Таъмин намудани сокинони мамлакат бо ҷойҳои нави корӣ ва дар ин замина кам намудани сатҳи камбизоатӣ яке аз ҳадафҳои асосии Ҳукумати мамлакат ба шумор меравад. Дар ин раванд коргоҳ 55 нафар сокини маҳаллиро бо ҷойи кори доимӣ таъмин намудааст, ки 40 дарсадро бонувон ташкил медиҳанд. Музди меҳнат аз 2700 сомонӣ дар як моҳ ва беш аз инро дар бар мегирад. Ғайр аз ин, дар арафаи иду ҷашнҳо кормандон бо маблағҳои пулӣ ва маводи озуқа ҳавасманд мегарданд. Давомнокии кор ҳашт соат буда, кормандон чошт бо ғизои гарми ройгон таъмин мешаванд.

–Тули ду сол аст, ки дар ин корхона фаъолият дорам. Дар дастгоҳҳое, ки дафтар истеҳсол мекунанд, кормандон маҳсулоти нуқсдорро аз он миён ҷудо месозанд. Ман сифати кори онҳоро назорат мебарам. Маошро сари вақт мегирем, нимаи рӯз ҳама хӯроки гарм тановул мекунем. Аз шароите, ки барои кормандон фароҳам овардаанд, ҳамагӣ қаноатмандем, - изҳор намуд сардори сех Муҳайё Алимова. 

ҶДММ “Папирус” ғайр аз фаъолияти истеҳсолӣ боз ҳамчун дилери яке аз ширкатҳои россиягӣ мебошад, ки варақҳои ҳаҷми А4 ва А3-ро аз Россия ба Тоҷикистон интиқол медиҳад. Ба суоли чаро худи коргоҳ чунин варақҳоро истеҳсол наменамояд, А. Аҳмадҷонов гуфт:

-Барои истеҳсоли чунин варақҳо комбинати коғазҳои селлюлёзӣ зарур аст. Созмон додани чунин коргоҳ аз як қатор омилҳо вобаста буда, ҷараёни мураккаб ва хароҷоти гаронбаҳо мехоҳад. Аввал ин ки ашёи хом ба таври доимӣ бояд таъмин бошад, яъне ҳаҷми зиёди чӯб ва об  зарур меояд, баъдан инфрасохтори рушдкардаи нақлиётӣ ва энергетикӣ. Ғайр аз ин, коргоҳ бояд ба меъёрҳои экологӣ пурра ҷавобгӯ бошад, яъне бо технологияҳои гаронбаҳо пок сохтани обҳои равон ва кам кардани партовҳои истеҳсолӣ. Ҳамчунин, масъалаи маблағгузорӣ ва рақобатпазирии он бояд ба инобат гирифта шавад. Дар нақша ҳаст, ки оянда ашёи хомро дастрас карда, истеҳсоли чунин варақҳоро ба роҳ монем. Алҳол дар Тоҷикистон ва Ӯзбекистон чунин кор ба роҳ монда нашудааст ва воридоти чунин коғазҳои корӣ аз Россия ва Қазоқистон сурат мегирад.

Маҳсулоти коргоҳ қариб 60 дарсади талаботи аҳолии шаҳри Хуҷандро қонеъ гардонда, асосан аз ҷониби мактабҳо ва донишгоҳҳо барои харидории чунин маҳсулоти босифати ватанӣ мароқ зоҳир мегардад. Масъулини коргоҳ ният доранд, ки истеҳсоли маҳсулотро аз муқова то бандубасти ниҳоӣ пурра ба роҳ монда, содиротро дар ҳаҷми то 50 фоиз ба Қирғизистон ва Туркманистон ташкил кунанд. Ҳоло марҳалаи гуфтушунид барои ҳамкорӣ бо ин кишварҳо идома дорад.

 -Нархи дафтарҳои мактабӣ аз 50 дирам сар мешавад. Аз сертификатсияи байналмилалӣ гузашта, аз дафтарҳои дар Россия истеҳсолшуда ҳеҷ камӣ надоранд. Ин аст, ки харидорони онҳо дар Қазоқистон зиёданд. Нархи маҳсулоти мо аз он лиҳоз паст карда намешавад, ки он метавонад ба сифати чоп халал ворид созад. Яъне, мо намехоҳем он сифатеро, ки имрӯз бо он шинохта гаштаем, аз даст диҳем. Соли гузашта як миқдор маҳсулоти хешро ба Россия интиқол додем ва азбаски ҳоло дар ин кишвар майдонҳои фурӯши интернетии “Озон” ва “Вайлберис” ниҳоят фаъоланд, мо низ мехоҳем бо ин шева фурӯши маҳсулоти худро дар ҳудуди ин кишвар роҳандозӣ намоем, - иброз дошт А. Аҳмадҷонов.

Аз ҷониби намояндагони бахши хусусӣ таъсис додани корхонаҳои саноатӣ ва тавлиди маҳсулоти рақобатпазири ивазкунандаи воридотро Сарвари давлат муҳтарам Эмомалӣ Раҳмон ҳамаҷониба дастгирӣ намуда, бо ин мақсад тамоми имконотро фароҳам овардаву имтиёзҳои зиёдеро пешбинӣ кардаанд. Ин аст, ки танҳо дар соли 2024 дар ҷумҳурӣ 740 коргоҳу корхонаҳои нави истеҳсолӣ бунёд гардида, қариб 20 ҳазор ҷойи нави корӣ таъсис дода шуд. Дар панҷ соли охир, маҷмуи маҳсулоти саноатии кишвар аз 27 миллиард ба 53 миллиард сомонӣ расид, ки дастоварди бузурге дар ин масир маҳсуб меёбад.

                                             Ситора  АШӮРОВА,

                                          Душанбе - Хуҷанд - Душанбе