Оши буридаи кӯҳистонӣ

Оши буридаи кӯҳистонӣ

Маҳсулоти зарурӣ:

Нахӯд – 100 г.

Лӯбиё – 100 г.

Қаланфури булғорӣ – 2–3 дона.

Пиёз – 2 дона.

Зувола – (аз 1 дона тухм ва обу орд).

   Кабудиҳо – пудина, райҳон, кашнич, шибит, шулха, газанда, барги гули «тоҷи хурӯсак», кокулҷамилак, барги лаблабу.

Тарзи таҳия:

Ба дег об  андохта, лӯбиё ва нахӯдро то мулоим шудан мепазем. Зуволаро тунук карда, борик-борик мебурем ва бо орд даста мезанем. Кабудиҳоро хуб шуста, реза карда, ба дег илова менамоем. Баъди андаке нарм шудани кабудиҳо буридаҳоро боэҳтиёт ба дег андохта, дар оташи баланд зуд-зуд мекобем ва баъди 5 дақиқа дегро аз оташдон мегирем. Хӯроки омодашударо ба табақ ва ё лаълии оҳанӣ кашида, рӯйи онро бо кабудиҳои тару тоза, ҷурғот ва маскаи хонагӣ оро медиҳем.

Санбӯсабирён

Маҳсулоти зарурӣ:

Орд – 400 г.

Равған – 50 г.

Об – 300 г.

Картошка – 2 дона.

Пиёз – 1 дона.

Гӯшт – 100 г.

Равған барои бирён кардан – 500 г.

Кабудиҳо - райҳон, пудина ва шибит 3–4 баргӣ.

Тарзи таҳия:

Аз орду обу равған зувола шӯрида, каме дам медиҳем. Картошка, пиёз ва гӯштро чаҳоркунҷӣ майда реза карда, кабудиҳоро низ майда менамоем. Ҳамаи онро ба ҳам омехта, намаку мурч мезанем. Зуволаро тунук карда, ба шакли чоркунҷа мебурем. Зирбаки омодакардаро якқошуқӣ ба даруни буридаҳо мегузорем ва дуқат карда, гӯшаҳои онро маҳкам мекунем. Равғанро ба тоба рехта, андаке метасфонем ва санбӯсаҳоро бирён мекунем.