Донишгоҳи технологии Тоҷикистон 17 ҳазору 647 мутахассис омода кардааст

Дар донишгоҳ 8 факултет, 6 идора, шуъбаи омодасозии кадрҳои илмӣ ва илмӣ-педагогӣ, 20 кафедра, 4 марказ, инчунин филиали донишгоҳ дар шаҳри Исфара ва Литсейи инноватсионии “Душанбе” фаъолият мебаранд, қайд гардид дар нишасти матбуотии Донишгоҳи технологии Тоҷикистон.

Дар донишгоҳ дар 211 гурӯҳи академӣ дар маҷмуъ 3100 нафар донишҷӯ тибқи низоми кредитӣ таҳсилот мекардаанд.

Бо қарори Шурои аккредитатсионии Агентии мустақили рейтинг ва аккредитатсияи Ҷумҳурии Қазоқистон аз 26 январи соли 2024 ду ихтисоси амалкунандаи равияи технологияи саноати хӯрока аз аккредитатсияи байналмилалӣ гузашта, 5 ихтисоси донишгоҳ соҳиби шаҳодатномаи аккредитатсияи байналмилалӣ мебошанд. 

Бояд гуфт, ки донишгоҳи мазкур дар тӯли фаъолияташ зиёда аз 17647 мутахассисонро ба соҳаҳои гуногуни иқтисоди кишвар тайёр намудааст, ки 680 нафарашон донишгоҳро бо дипломи аъло хатм кардаанд.