Ояндасозони Хуҷанд

Таҳсил дар мактабҳои миёна, ба сабаби баромадан ба истироҳати тобистона ба охир расида бошад ҳам, дар Литсейи физикӣ – математикии №1 ба номи академик Муҳаммад Осимии шаҳри Хуҷанд ҳамоно ҳаёт ҷӯш мезанад. Ҳисси кунҷковӣ боло мегираду якеро мепурсам: «Ба таътили тобистона набаромадед?».

 –Мо аъзои маҳфили «Технологияи информатсионӣ» ҳастем ва новобаста ба мавсими таътил, ҳафтае се маротиба дарс мехонем. Иқдом аз ҷониби директори муассиса аст, ки мо онро хуш пазируфтем…

Ба дафтари кории директор ворид мешавам, шумораи гулҳои зиёд гулистонеро мемонад, ки дарак аз боғбони заҳматписанд будани соҳибашро медод. Омӯзгори ботаҷрибаву соҳибэҳтиром Муҳайё Акмалхӯҷаеваро саргарми кор дармеёбам.

- Мо аз Душанбе омадем, то фаъолони шаҳри Хуҷандро дар маҷаллаи «Бонувони Тоҷикистон» инъикос намоем. Аз Мақомоти иҷроияи ҳокимияти давлатии шаҳри Хуҷанд моро ба Литсейи шумо роҳнамун сохтанд.

Симои гарму табассуми малеҳаш дигарбора таваҷҷуҳи маро ба худ кашид. Иқрор омад, ки аз муаллим будан ифтихор дорад, зеро бо нону намаки ин пеша устухонаш сахт шудаву пайроҳаи модарро интихоб намудааст. Падар бошад, бо руҳи шикастнопазирии духтараш бовар дошту ҳидоятгараш дар ин роҳ буд. Бо самимияти фаровон аввалин маслиҳатгар, беҳтарин омӯзгори рӯзгори хеш зодмандони худро медонад. Бо дастгирии онҳо соли 1990 Институти давлатии педагогии Душанбе ба номи Т.Г. Шевченкоро бо ихтисоси муаллими фанни математика - информатика ва ҳисоббарор хатм намуда, имрӯз дар қатори чеҳраҳои намоёни соҳаи маорифи шаҳри Хуҷанд қарор дорад.

Фаъолияти хешро Муҳайёбону аз МТМУ №16 шуруъ намуда, дар Литсей-гимназияи №3 омӯзгор ва соле чанд дар вазифаи сармутахассиси шуъбаи маорифи шаҳр кор карда, инчунин, мудирии шуъбаи маорифи шаҳри Хуҷандро ба уҳда дошт. Аз соли 2022 директори Литсейи физикӣ-математикии №1 ба номи академик Муҳаммад Осимӣ мебошад.

 - Дар давоми соли таҳсил хонандагони муассиса дар олимпиадаҳои ҷумҳуриявӣ ва байналмилалӣ беш аз 100 медал ба даст оварданд. Сол ба сол шумораи хонандагоне, ки дар олимпиадаҳо иштирок мекунанд, зиёд мегардад, - бо хушнудӣ изҳор дошт ӯ. - То кунун 120 нафар дар олимпиадаи ҷумҳуриявӣ сазовори ҷойҳои ифтихорӣ гашта, 5 хонанда аз фанни математика ва технологияи иттилоотӣ ҷойҳои дуюм ва сеюмро ба даст овард. Дар Озмуни ҷумҳуриявии «Барномасози беҳтарин» 4 нафар хонандаи литсей сазовори ҷойҳои якум ва дуюм гардид. Гурӯҳи духтарони волейболбоз дар мусобиқаи байни муассисаҳои таълимӣ бахшида ба Рӯзи ҷавонони Тоҷикистон, соҳиби ҷойи аввал гардиданд,- бо хушнудӣ мегӯяд мудир.

Бояд гуфт, ки литсейҳои кишвар аз рӯйи як барномаи таълимӣ, ки онро Вазорати маориф ва илм тасдиқ намудааст, дарс мегузаранд. Фарқи литсейи мо дар он аст, ки соатҳои фанҳои дақиқ бештар таълим дода мешавад. Ҳамчунин, дарсҳои иловагӣ ба соатҳои таълимӣ зам шуда, хонандагон ҳамарӯза аз соати 8 то соати 15 дарс меомӯзанд.

           Навгонӣ

Бо дастгирии собиқ хатмкунандагони литсей дар соли таҳсили 2023–2024 синфхонаҳои алоҳида барои маҳфилҳои «Шоҳмот», «Барномасозӣ» ва «Асосҳои соҳибкорӣ» пурра таъмиру азнавсозӣ ва бо таҷҳизоти замонавии таълим таъмин шуданд. Кунун хонандагон метавонанд дар давраи таътили тобистона дар дилхоҳ маҳфил аъзо шуда, машғулият гузаранд.

Маорифпарварони асил дар рушду такомули мактабу муаллим нақши муҳимро мебозанд. Мо дар симои омӯзгори соҳибтаҷриба Муҳайё Акмалхӯҷаева нафари арзандаеро кашф намудем, ки қалбаш барои беҳбуди соҳаи маориф метапад.

Муҳайёбону 35 сол аст, ки худро дар оғӯши мактабу маориф, дар ҳалқаи ташнагони илму дониш мебинаду дар андешаи беҳбуд бахшидан ба ин пеша гоми устувор мениҳад ва умедвориҳояш аз ин насли ояндасоз кам нестанд. Ба ободии муассиса ва тозаву озода будани ҳар гӯшаи он дида духта, боварамон меомад, ки дар ҳақиқат омӯзгори асил беҳуда мӯйи худ дар ин росто сафед накардааст.

                                   Фарзона ВОСЕЕВА,

                           Душанбе - Хуҷанд - Душанбе