Рушди маориф масъулияти умумимиллист

Бо Шаҳноза Мақсудзода, мудири маорифи шаҳри Хуҷанд, гирди мавзуи маорифу таълиму тарбияи насли имрӯз, суҳбат доштем. Вақте аз муваффақияти кори омӯзгорону мураббиёни муассисаҳои мактабӣ ва томактабӣ қисса мекард, чашмонаш барқ мезаданд. Тавсифи комёбиҳою дастовардҳои маорифчиён карда, ифтихор аз он дошт, ки дар ҳалқаи муҳофизони насли миллат фаъолият менамояд.

Бунёди ояндаи боэътимоди миллат ба рушди соҳаи маориф вобастагии зич дорад. Сарвари давлат муҳтарам Эмомалӣ Раҳмон низ дар ҳар суханрониашон бо дастгирӣ аз самти маорифи кишвар таъкид бар он менамоянд, ки асоси пешрафти ҷомеа ва кафолати ояндаи дурахшони миллат ба рушди соҳаи маориф тавъам мебошад.

- Дар ин давраи ҳассос, яъне дар замони ҷаҳонишавӣ мо, сар аз оила то мактабу ҷомеа, мебоист худро дар рушди маориф масъул донем. Бо камтарин кумак тавонем, саҳме дар пешрафти илму маориф гузорем, то наслҳои баъдина давомдиҳандаи кори мо бошанд.

Имрӯзҳо дар ҳар гӯшаю канори шаҳр идома ёфтани сохтмон ва мавриди истифода қарор гирифтани мактабу муассисаҳои томактабӣ ва марказҳои рушди кӯдакон аз ҷониби давлату Ҳукумати кишвар ва шахсони алоҳидаю соҳибкорони маҳаллӣ боиси хушнудист. Ба қарибӣ дар маҳаллаи «Ваҳдат»-и шаҳри Хуҷанд кӯдакистони «Навбаҳор»-ро соҳибкор Фотеҳхон Маъсумов бо иштироки Сарвари давлат муҳтарам Эмомалӣ Раҳмон ба истифода доданд. Дар ин муассисаи томактабӣ 35 мураббия соҳиби ҷойи кор гардида, 300 кӯдак ба тарбия фаро гирифта шуд, - иброз намуд Шаҳнозабону Мақсудзода.

Моҳи май даври шаҳрии озмуни «Мураббии сол» доир шуд, ки дар он 32 мураббӣ аз муассисаҳои томактабӣ ширкат варзид. Рақобат хеле тезу тунд буд. Ҳайати ҳакамон аз миёни довталабон маҳорати педагогӣ ва эҷодии мураббияи Муассисаи таҳсилоти томактабии №3-юми шаҳри Хуҷанд Парвина Абдуллоеваро ба инобат гирифта, ба даври вилоятӣ роҳхат доданд.

Ғолиби даври шаҳрии озмуни «Омӯзгори сол» Нодира Шодиева, муаллими фанни забони давлатии МТМУ Россия-Тоҷикистон бо омӯзиши фанҳои дақиқ ба номи А.Чехов гардид. –

Дар баробари муваффақиятҳои омӯзгорон дастовардҳои хонандагон низ бо ширкаташон дар озмуну олимпиадаҳо боиси ифтихоранд. Дар озмуни «Хонандаи сол-2025» аз 52 муассисаи таълимӣ беш аз 1000 хонанда иштирок дошт, дар даври дуюм хонандаи синфи 10-уми Литсейи назди Донишгоҳи политехникии шаҳри Хуҷанд Мухлиса Комилҷонова мақоми аввалро соҳиб гашт.

Хусрав Бобоҷонов, хонандаи гимназияи ба номи Ё.В. Гёте бо дониши хубу лаёқати баланди донишандӯзиаш барандаи идрорпулии байналмилалии DAAD дар соли 2025 гардида, соҳиби 56 ҳазор евро шуд, - ифтихормандона мегӯяд ҳамсуҳбатам.

Муассисаҳои таълимии шаҳр бо омӯзгорони фаннӣ таъмин буда, барои тақвият бахшидан ба сатҳи забондонии муаллимон ва хонандагон маҳфилҳои омӯзиши забонҳои хориҷӣ ва дарсҳои иловагӣ роҳандозӣ шудаанд. Имрӯзҳо дар муассисаҳои таълимии шаҳри Хуҷанд 250 омӯзгори фанни забони русӣ ва 286 омӯзгори фанни забони англисӣ ба толибилмон забони хориҷӣ меомӯзонанд.

- Ман хатмкардаи факултаи забонҳои хориҷии Донишгоҳи давлатии шаҳри Хуҷанд ба номи Б. Ғафуров мебошам. Ихтисосам омӯзгори забони англисист. Сарфи назар аз ихтисосманди кадом фан ё соҳа будан, донистани забонҳои русӣ ва англисӣ ҳатмист. Ин нуктаро ба омӯзгорон низ таъкид менамоям. Алҳол, аксари омӯзгорони муассисаҳои таълимӣ новобаста аз он ки муаллимони фанҳои алоҳидаанд, забони англисиро низ хуб аз бар намудаанд ва дар муошират озодона ҳарф мезананд.

Ҳамчунин, байни хонандагон сари ҳар вақт викторина ва озмунҳо ҷиҳати муайян намудани сатҳи забондонии шогирдон гузаронда мешавад. Омӯзиши 400 вожаи забони англисӣ созгор аст, ки ҳар хонанда ва омӯзгор калимаҳоро аз ёд намуда, байни худ гуфтугӯ кунанд. Дар баробари омӯзиши забонҳои хориҷӣ фарҳанги миллӣ ва урфу одатҳои аҷдодиро наметавон сарфи назар кард. Тариқи вохӯрию чорабиниҳо талош меварзем, то дар қалби ҳар нафар ҳисси ватандорӣ ва худогоҳии миллиро бедор созем, - иброз дошт Шаҳнозабону.

Зимнан, бо вуҷуди омӯзиши забонҳои хориҷӣ ва фанҳои алоҳида, интихоби касб яке аз самтҳои тарбияи меҳнатии хонандагон мебошад. Дар муассисаҳои таълимии шаҳри Хуҷанд 14 номгӯйи маҳфилҳо амал менамояд, ки толибилмон ба омӯхтани ҳунарҳои зардӯзӣ, рассомӣ, қаннодӣ, бофандагӣ, кашидадӯзӣ, гулпарварӣ, дӯзандагӣ ва дигар пешаҳо ҷалб гардидаанд.

Дар маҳфилҳои ҳунаромӯзӣ беш аз 3500 хонанда ҷалб шудааст, ки устодони касбу ҳунар ба онҳо пеша меомӯзонанд. Таҷҳизот ва дастгоҳҳои бофандагӣ, дӯзандагӣ ва ашёи хоми корӣ барои боз ҳам беҳтар намудани фаъолияти маҳфил ва ҳунаромӯзии хонандагон имкони хуб фароҳам меоранд.

Вақте аз мушкили соҳа ҷӯё шудем, Шаҳнозабону лаҳзае сукут варзида, гуфт:

- Мушкили кор дар муассисаҳои таълимашон ба забони русӣ ин аст, ки омӯзгорони фанни табиӣ ва риёзӣ намерасанд. Дар ин самт мутахассисони варзидаи забондон зарур аст, то хонандагон аз омӯзиши ин фанҳо қафо намонанд. Толори Маркази дарёфт ва рушди истеъдодҳо ба таъмир ниёз дорад. Ҳамчунин, вақти таъмир намудани майдону толорҳои варзишии муассисаҳои таълимӣ фаро расидааст. 

                                           Қутбия НЕЪМАТУЛЛО,

                            Душанбе - Хуҷанд - Душанбе