“Ғунчаҳои”- Варзоб

Дар номгӯйи беҳтарин дастовардҳои ноҳияи Варзоб Муассисаи таълимии хусусии инкишофи кӯдак ва таҳсилоти ибтидоии Чорбоғро ба мо муаррифӣ намуданд. Бо роҳбаладии намояндаи шуъбаи маориф вориди ин муассиса шудем. Бинои сеошёна барои 120 нафар таълимгиранда пешбинӣ шуда, дорои боғча ва мактаби ибтидоӣ мебошад. Муассисаи мазкур соли 2022 дари худро барои наврасон во намуда, айни замон ин ҷо 40 нафар дар боғча ва 25 нафар дар мактаб ба таълиму тадрис фаро гирифта шудааст.

Таҳсил дар ин даргоҳ шартномавӣ буда, маблағи пардохтнамудаи зодмандон асосан барои таҷҳизондани синфхонаҳо бо ашёи зарурии хониш, асбоби аёнӣ ва ғизо сарф мешавад. Машғулиятҳо дар муассиса аз соати 8:00 оғоз ёфта, то соати 17:00 идома меёбанд. Давоми рӯз кӯдаконро баробари хобу истироҳат машғулиятҳои шавқовар аз ҷониби мураббияҳои соҳибтаҷриба ва омӯзгорони забондон интизоранд. Машғулиятҳо дар кӯдакистон бо забонҳои англисӣ ва русӣ сурат мегиранд. Муаллимону мураббияҳои соҳибтаҷриба барои ҷалб намудани тифлакон омӯзиши забонҳоро сода аз ашёҳои одӣ оғоз бахшида, зина ба зина ба вазифаҳои мураккаб мегузаранд, ки ин барои бачаҳо хеле шавқовар мебошад. Дар зинаи дуюм омодагӣ ва фарогирӣ ба мактаб, машғулиятҳо тариқи бозиҳои ҷолиб, бо суруду мусиқӣ, тамошои филмҳои тасвирӣ, нишон додани аёниятҳо мегузаранд.

- Кӯдаконе, ки дар боғча тарбият мегиранд, ҷаҳонбиниву даркашон аз дигар ҳамсолонашон фарқ мекунад, зеро онҳо инҷо дар гурӯҳҳои тайёрӣ ба мактаб аз ҷониби мураббиёни тахассусманд омода мешаванд, вобаста ба ҳолати равонӣ, қобилият, завқи кӯдакро ба инобат гирита, бо онҳо кор мебарем, - мегӯяд директори муассисаи таълимӣ Сайбӣ Бӯризода ва идома медиҳад,

- «Мақсади бузурги маориф на танҳо андӯхтани дониш, балки қабл аз ҳама амал кардан аст», - гуфтааст олими сатҳи ҷаҳонӣ Н.Мирон. Яке аз самтҳои афзалиятноки сиёсати пешгирифтаи сармеъмори сулҳи тоҷикон, Сарвари давлат муҳтарам Эмомалӣ Раҳмонро маҳз соҳаи илму маориф ташкил медиҳад ва пешрафти кишвар ва пойдории миллатро устувор будани ин ришта таъмин месозад.

-Замони соҳибистиқлолӣ дар сартосари Тоҷикистон қомат афрохтани мактабҳои замонавӣ, ки бархӯрдор аз беҳтарин шароити таълиму тадрис мебошанд, далели ин гуфтаҳост, - иброз медорад Сайбӣ Бӯризода.

Барномаи рушди таҳсилоти томактабӣ дар Ҷумҳурии Тоҷикистон барои солҳои 2020–2025, ки дар амал аст, яке аз бандҳои он, ташкил ва таъсиси марказҳои инкишофи кӯдак мебошад, зеро таҷрибаи ҷаҳонӣ ва бисёрсолаи равоншиносон исбот намуд, ки кӯдакони дар боғча ва маркази инкишофи кӯдак тарбияёфта аз кӯдакони дар хона тарбиягирифта аз ҷиҳати дониш ва ҷаҳонбинӣ ба куллӣ фарқ доранд. Дар онҳо маҳорату малакаи суханронӣ, ҳурмату эҳтироми калонсолон, фаъолияти хоси фикрӣ, ахлоқӣ ва зебоипарастӣ баръало эҳсос мегардад. Ин ҳама меҳнати омӯзгорони зинаи аввали таълимро осон ва сифати таълиму тарбияро баланд мебардорад.

Бачаҳо дар кӯдакистон масруфи машғулиятҳо буда, реҷаи рӯзро риоя менамоянд, ба мисли машқи пагоҳирӯзӣ, наҳорӣ, машғулиятҳои гуногун, сайру гашт, хоби нисфирӯзӣ, сурудхонӣ, дарсхонӣ, рақс, расмкашӣ, суробсозӣ ва ғайра. Бачагони гурӯҳҳои миёна ва омодагӣ ба мактаб дар чорабиниҳои идонаи муассиса ва ноҳияи Варзоб фаъолона ширкат варзида, дар саҳначаву намоишҳои ҷолибу шавқовар моҳирона нақш мебозанд.

Директори муассиса Сайбӣ Бӯризода бо таҷрибаи 40-солаи омӯзгорӣ пештар дар муассисаҳои таълимии пойтахти кишвар аз фанни забони русӣ дарс мегуфт. Шавҳараш, ки худ дар оилаи омӯзгор ба воя расида буд, барои поси хотири падари соҳибэҳтиромаш дар деҳа азми сохтани чунин муассисаро ба сар гирифт. Ба расидани синни нафақаи Сайбибону кор бо бачаҳои муассиса барояш руҳу илҳоми тоза бахшида, хастагии хешро ҳатто эҳсос намекунад. Таҷрибаи ғании ин бону дар масири таълиму тарбия сазовори таваҷҷуҳ буда, бо 16 нафар кормандон муносибати хубро ба роҳ мондааст. Ин аст, ки омӯзгорони ҷавони муассиса аз таҷрибаи бисёрсолаи ӯ истифода мебаранд.

Мураббия шахсест, ки пас аз модар нафари дуюм дар ҳаёти кӯдакон ба шумор меравад. Дар ин касб муҳим дӯст доштани кӯдакон аст. Мураббия - ҳунарманд, рассом, эҷодкор аст, ки барои болида гардондани руҳияи хурдтаракон заҳмат мекашад. Ҳамин аст, ки мураббияҳои меҳрубон ҳеҷ гоҳ аз хотир фаромӯш намешаванд. Омӯзгори собиқадор дар кору вазифа бо овардани ин андешаҳо моро дилпур месохт, ки ҷараёни таълиму тарбия воқеан ҳам дар ин муассиса хуб ба роҳ монда шудааст. 

Ҷое хондаам: «Агар касеро дидед, ки дарку фаҳми фаротар аз ҳадди мутаориф (маъмул) дошт, ҳатман аз ӯ бипурсед, ки чӣ китобҳое мехонад». Ин андешаи мутафаккири ғарб Эмерсун аст. Қаҳрамони мо низ доим пайи омӯзишу ҷустуҷӯҳост, пайваста бо мураббияҳо суҳбатҳо гузаронда, нисбати таъсирбахш гузарондани машғулиятҳо ба ҳар кадом тавсияҳои хуб медиҳад.

-Ин ҳама ғамхориҳои давлат баҳри он аст, ки фарзандони халқ дар беҳтарин шароит сабақ омӯзанду дар оянда Ватани хешро ободу пешрафта созанд, - гуфт директори муассиса Сайбӣ Бӯризода.

Бонуи сарвар имрӯз оилаи солим дораду шавҳари меҳрубон ва дар ҳалқаи фарзандону наберагони дӯстрӯ рӯзгори хуше мегузаронад.

-Ҳамдигарфаҳмиву эҳтиром зиндагиро зинат мебахшанду шароити мусоид барои кор фароҳам меоранд, - мегӯяд Сайбибону. Дар баробари масъулияти омӯзгорӣ ба омӯзгорони ҷавон тавсия медиҳад, ки дар зиндагӣ ҳамеша ба якдигар эҳтиром дошта бошанд, зеро, ба пиндошти бонуи рӯзгордида, танҳо лутфу марҳамат ва эҳтироми ҷонибҳо оиларо пойдору устувор нигоҳ хоҳанд дошт.

                                              Фарзона ВОСЕЕВА,

                                    Душанбе - Варзоб - Душанбе