Духтари оташ

Ман ҳамин духтари оташро дар ноҳияи Варзоб дидам. Чусту чолок, пурэнержӣ, доно, кордон. Зимни шиносоӣ бо фаъолияти коргоҳи дӯзандагиаш, аз суҳбаташ ҷаҳоне маънӣ бардоштам. Бовар дорам, ҳар зане мисли ӯ таваккал бикунаду нотарс ба азме ҷазб бишавад, ҳатман муваффақ хоҳад шуд. Иқрор аст, ки борҳо аз тақдир шикаст дида, фиреб хӯрдааст, мушкилу нобаробариро таҷриба кардааст, аммо боре ноилоҷ кунҷи хона паноҳ набурдааст…

Гулдаста Бобомуродова, раиси Ҷамъияти матлуботи ноҳияи Варзоб, 20 соли умрро дар вазифаҳои гуногуни роҳбарӣ паси сар намудааст. Бонуи кордон дар соҳаҳои гуногуни риштаи иқтисод ва савдо дар шаҳрҳои Душанбе, Левакант, Бохтар, Ҳисор, ноҳияи Варзоб фаъолият бурдааст.

         Соли равон ҳамчун узви Палатаи савдо ва саноати Тоҷикистон дар намоишгоҳи ЭКСПО-2025, дар Ҷумҳурии Мардумии Чин, ки намояндагони 150 кишвари дунё ширкат намуданд, ман ҳам ҳузур доштам. Хонаи миллии тоҷикона оростем, ки бо меваю обҳои ширини кӯҳиамон, бо меҳмоннавозии тоҷиконаамон диққати тамошогаронро ба худ кашид. Бастабандиҳои диданӣ бо сифати олӣ ҳамаро тасхир карданд. Хушкмеваҳои мо бе тардид аз беҳтарин маҳсулоти ин намоишгоҳ буданд.

                      Шарифа Қурбонова, дӯзанда

- Тоза аз Форуми иқтисодии Вилояти Мухтори Кӯҳистони Бадахшон баргаштам. Пас аз ин ду сафари охир дар паи ба роҳ мондани корҳои чорводорию кишоварзӣ дар ҳудуди ноҳияи Варзоб афтодам. Ҳамроҳи соҳибкорони чинӣ шартномаи таъсиси боғҳои интенсивии себро ба имзо расондем ва дар наздиктарин фурсат ба кор оғоз менамоем, - бо фараҳ меафзояд мусоҳибам.

Соли гузашта ба гирифтани Гранти президентӣ дар ҳаҷми 40 ҳазор сомонӣ шарафёб гардиду зуд дар фикри таъсиси коргоҳи дӯзандагӣ барои бонувони ноҳияи Варзоб шуд.

- Дидам, ки зодмандон дар арафаи соли таҳсили нав ҳамеша серкору сертараддуд мешаванд. Ҷониби бозор медаванду сӯи мағоза. Вақте қарори Ҳукумати Ҷумҳурӣ дар хусуси он ки ҳар ноҳиву шуъбаи маорифаш барои истеҳсоли либосҳои мактабӣ бояд коргоҳи дӯзандагӣ дошта бошанд, содир шуд, возеҳ дарк кардам, ки чунин як коргоҳ бояд дар ноҳияи Варзоб ҳам бошад, то занони бекорро бо ҷойи кор таъмин намоему маблағҳои хароҷотиро барои ғанисозии андоз дар ҳудуди ноҳия гардиш диҳем, - мегӯяд раиси Ҷамъияти матлуботиноҳия.

            «Дар назди хона…»

«Рӯзе 6–7 сарафан медӯзам. Хубиаш ин аст, ки коргоҳ дар назди хонаам аст. Соҳиби ду фарзанд ҳастам. Ба ғайр аз кори ин ҷо дар хона низ кор мекунам. Маблағи хубе моҳона аз касбам ба даст меорам».

“Аз таҷрибаи як бону «Дар вазифаи директори бозори шаҳри Ҳисор кор мекардам. Зимни сафари Президенти мамлакат муҳтарам Эмомалӣ Раҳмон ба шаҳри Сочии Федератсияи Россия супориш шуд, ки барои ярмарка-намоишгоҳ ба ин шаҳри сайёҳӣ 60 тонна ангур барем. Медонистам, ки барои он мардум намуди зебои маҳсулот дар ҷойи аввал меистад. Коршиносон мегуфтанд, ки бастабандии хуб харҷи зиёдро тақозо дорад. Таваккал кардему агурро бо беҳтарин бастабандӣ ва хуштарин сифат то шаҳри Сочи расондем. Таваҷҷуҳ ба меваҳои Тоҷикистон, хусусан ангури ҳисорӣ, чунон зиёд шуд, ки 60 тонна ангурро дар рӯзи аввали ярмарка тамом кардем. Он сафар гиёҳҳои гуногуни шифобахши дараи Варзоб ва оби Сиёмаро низ бо худ бурдем. Аввал одамон ба онҳо чандон мароқ зоҳир накарданд. Тариқи экранҳои калон макони пайдоиши оби Сиёма ва таровиши обро аз қалби кӯҳҳо нишон додему ба қавл телатумбак (ажиотаж) сар шуд. Об намонд”.

 Дар соли хониши 2025–2026 дастандаркорони коргоҳи дӯзандагии «Закия» мувофиқи шартнома бо шуъбаи маорифи ноҳияи Варзоб 3 ҳазор ҷуфт шиму костум, пироҳан (сарафан)-у нимтана (жикетҳо)-и мактабӣ омода намуданд. Соли оянда ин теъдодро то ҳадди ниҳоӣ, то охирон мактаббача зиёд карданианд. Ҳашт бону дар коргоҳ ва 12 нафар заноне, ки кӯдакони хурдсол доранд, дар хона ба кор ҷалб шуданд.

Имсол кӯшидем бо сифати баланди маҳсулот байни мардум шинохта шавем. Беҳтарин дизайну намудҳои замонавии либосҳоро барои фурӯш муҳайё сохтем. Аз шаҳри Душанбе дизайнеронро ба кор ҷалб намуда, эскизи либосҳоро дар Қазоқистон фармоиш додем, дӯзандаҳои гулдастро даъват кардем. Соли оянда нақша дорем як мутахассисро ба таври мавсимӣ, то ба охир расидани маъракаи дӯхти либосҳои мактабӣ ба Тоҷикистон орем. Аз таҷрибаам дар соҳаи савдо хуб медонам, ки дар рушди дилхоҳ кор аввал сифати баланд ва дуюм нархи дастрас зарур аст, - зикр намуд Гулдастабону.

Ӯ мехоҳад моҳи август дар маҳали баргузории ярмарка-фурӯши лавозимоти мактабӣ дар Маркази савдои ноҳияи Варзоб падару модарон ва фарзандони онҳоро бо тасмими дигаре шод намояд. Дар баробари либосҳои хушсифат, ба харидорон мувофиқи синну сол, рангу намуди ҳар либос ҷувздон, курта, галстук, пойафзолҳои мактабӣ, тоқиҳои «Баҳор» барои духтаракон ба фурӯш бароварда мешавад. Сокинон метавонанд китобу дафтар, қаламу ручка, тамоми лавозимоти хонишро аз ин ҷо харид намоянд.

                                          Шарифа Қурбонова, дӯзанда

  Фармоиш меги…

Мо фаъолиятамонро танҳо бо либосҳои мактабӣ маҳдуд накардаем. Либосҳои баландсифати тиббӣ, ҳарбӣ, пироҳани зебои занона дар тарҳу намудҳои гуногун омода месозем. Ҳоло рӯҷилдҳои кати хоб, кӯрпаву болиштҳо омода мекунем. Барои муваффақ шудан дар ҳар яке аз ин самтҳо дӯзандаҳои махсуси омодаро ҷалб кардаем. Пардадӯзеро бо таҷрибаи кор дар Федератсияи Россия даъват намудем, ки пардаҳои замонавиро бо тамоми санъату зебоӣ омода месозад. Дастархонҳои дӯхтаи чеварони мо, ба сифату зебоӣ аз дастархонҳои чиниву туркӣ камие надоранд, - бо қаноатмандӣ мегӯяд ҳамсуҳбатам.

Коргоҳи калонро аз назар мегузаронем. Маҳсулоти гуногуни омода ҳар яке дар рафҳои алоҳида ҷудо-ҷудо бастабандӣ шудаанд. Намунаҳое аз ҳар самти кори бонувон ба шакли диданӣ рӯи рафҳо ҷо-ҷо ба тартиб мақом ёфтаанд. Дар баробари пироҳанҳои миллӣ, либоси замонавӣ барои занону духтарон, хилъати бо орнаментҳои миллӣ орододашудаи тиббӣ, либосҳои махсуси ҳарбӣ, чашмам ба либосҳои зебои саҳнавие меафтад, ки онҳо махсус барои кормандони соҳаи фарҳанг омода шудаанд.

                 Қасри «Сомон»

«Боре қолинеро аз сабзаҷоту меваҷот дар чорабиниҳои сатҳи баланд, қабулу гусели сарварони давлатҳо, меҳмонони расмӣ мушоҳида кардаед? Таҳия намудани ин зебоӣ бениҳоят заҳмат мехоҳад. Хушбахтам, ки дар таҳияи ороиши аксар чорабиниҳои расмӣ саҳм гирифтаам. Дар сафари охири Президенти Қирѓизистон ба Тоҷикистон дар ороиши тарабхонаи «Бухоро», ки дар дохили Қасри «Сомон» ҷойгир аст, даст доштам. Кушидем он рўз ин маконро пурра бо рамзҳои зебои тоҷикона фараҳнок намоем, ки хушбахтона, ба ин мушарраф гаштем».

«5–6 ҳазор сомонӣ меёбам»

«Гарчанде худ соҳиби як коргоҳи дӯзандагии алоҳида ҳастам, дар коргоҳи «Закия» низ фаъолият мебарам. Пироҳани духтаронаи мактабӣ, либосҳои милливу аврупоӣ пора менамояму чеварон онро медӯзанд. Шиму костуму нимтанаҳои мактабиро мутахассисони дигар пора мекунанд. Умуман, дар коргоҳ ҳама масъулияти худро дорад. Куртаҳои арусӣ фармоиш мегирам, либосҳои аврупоӣ медӯзам. Тавассути ҳунарам моҳе 5–6 ҳазор сомонӣ маблаѓ ба даст меорам».

                                                   Манижа Шарифова, дӯзанда

Манижабонуро бо доштани нигоҳи замонавӣ, идеяҳои ҷолиб барои пора намудани либосҳои миллӣ, тиббӣ, ҳарбӣ ва мактабӣ ба «Закия» даъват карданд. Ҳамчунин, вобаста ба талаботи мардум ва тақвияти ҳунари зардӯзӣ дар коргоҳ як нафар зардӯзро низ ба кор ҷалб сохтаанд. Бонувони хонашине, ки ҳунари гулдӯзӣ доранд, метавонанд болиштчаҳо, рӯҷоҳои тахти хобро барои гулдӯзӣ бо худ ба хонаҳояшон бубаранд.

- Дар паҳлуи коргоҳи дӯзандагӣ мехоҳам як басти шириниҳои хонагиро фаъол намоям. Сари ин мавзуъ низ идеяҳои ҷолиберо амалӣ карданиам, умед дорам, ки дар анҷоми ин ҳама нақшаҳо муваффақ хоҳам гашт, - мегӯяд Г.Бобомуродова.

- То ин ҷо мо бештар дар хусуси дастовардҳо ҳарф задем. Имкон дорад аз таҷрибаи нокомиҳоятон ҳам ёдовар шавед?, - мепурсам аз ҳамсуҳбатам ва ӯ қисса мекунад:

- Дар шаҳри Бохтар фаъолият доштам. Соли 2013 бо соҳибкорони чинӣ барои ворид намудани пойафзол ва ҷувздони мактабӣ ба андозаи бисёр бузург қарордод бастем, аммо онҳо фиреб доданд. Ба ҷои маҳсулоти фармоишии мо, маҳсулоти комилан бесифат фиристоданд. Гап сари маблаѓи бениҳоят калон мерафт. Борро баргардонда бошем ҳам, онҳо маблаѓро пас нагардонданд. Ҳар нафар хато мекунад, ман худро зуд ба даст гирифтам, бештар заҳмат кашидам ва қарзҳоро пардохтам. Чунин мисолҳо ва қиссаҳои дигари хастакунанда дар зиндагӣ зиёд буданд, аммо ҳеҷ гоҳ бо мушкилу ноҷӯриҳо тан надодам. Агар ба ақиб мегаштам, дигар ҳеҷ гоҳ ба самти пеш ҳаракат карда наметавонистам. Хушбахтона, ман инро хуб дарк мекардам!

                           Гулноза БОБОМУРОДОВА,

                            Душанбе-Варзоб-Душанбе