Хуҷанд - шаҳре нурафшону гулафшон

Чанд рӯзе, ки меҳмони шаҳри Хуҷанд будем, ба заҳмати занони тозакори кӯчарӯб ва хоҳарону модарони гулпарвар зеҳн мондам, то ҷойе, ки ба давраашон ҳамроҳ шудаму аз суҳбати гармашон баҳравар.

Холаҳои тозакор субҳи барвақт, соати чор, дар ҳар кунҷу канори шаҳр ҳозир мешаванд. Ҳар нафар гӯшаи муайяни худро дорад, мечинаду мерӯбад, ба сабзаҳои навруста об  мепошаду бехи дарахтҳоро шодоб мегардонад.Тамизкорон вақти холӣ ба ёрмандии ҳамкори худ мераванд ва дами фароғатро якҷояву бо ҳам мебинанд. Ҳамагӣ либоси ягона ба бар, машғули кор, ба ҷуз рӯбучин гул мешинонанду гулҳоро қаламча мезананд. Чор фасли сол, гарчи машғулияти онҳо иваз мешавад, мақсад ҳамоно якест, тозагию озодагӣ ва ободкории шаҳри азизашон, ки ба қавли яке аз онҳо: «Бисёр дӯст медорад Хуҷандрову аз канораш дур рафтанро дар дил надорад».

Рӯзе, ки ба дидорашон расидем, ақрабаки соат майл ба дувоздаҳ дошт, аммо ҳанӯз ҳам бонувон машғули кор буданд. Гурӯҳе ба гулҳо об мепошиду коғазҳои партофтаю хасрӯбаҳоро меғундошт, гурӯҳи дигар ба мошин қуттиҳои аз гулу ғӯра холишударо бор мекард. Манзараи корӣ, дарвоқеъ диданию нигоштанӣ ба назар мерасид…

– Тозакорӣ вазифаи ҳамарӯзаи мост, аммо, агар мардум фарҳанги шаҳрнишиниро риоя мекарданд, кори мо қадре сабук мешуд, - мегӯяд яке аз ин модарон, ки солиёни зиёд дар кӯчаҳои шаҳр тозакор аст.

Бонуҳои тозакор арз медоранд, ки саҳар хестану ба кор омадан, барояшон одат шудааст ва чӣ тобистону чӣ зимистон ҳеҷ мушкилеро барояшон пеш намеорад. Аз онҳо ному насаб напурсидем, вале ҳамагӣ иқрор шуданд, ки ҳарчанд шуғли одӣ доранд, ба иҷрои он бо ҳавсала менигаранд. Дигаре мегуфт, ки гарде рӯйи кӯчаҳои шаҳр бинад, худро ором ҳис намекунад. Бонуи сеюм бо ифтихор нақл мекард, ки маҳз ҳамин тозакорию гулафшонкунии шаҳр дар умқи дилашон ба ҳадде маъво гирифтааст, ки ҳавлии худро низ бо ёрии келину духтаронаш ҳамин гуна зебову гулбез зинат додаанд. Мо ҳатто чизе дар хона аз ин боб нагӯем ҳам, аҳли хонавода дарк мекунанд, ки мо зебоипарастему зебоиро дӯст медорем.

Нафари дигар, ки собиқаи хеле зиёд нисбат ба ҳамроҳонаш дорад, бо хушнудӣ иброз дошт, ки роҳбари муассиса инсони дурандешу бомаърифат аст ва дар иҷрои корҳои ҳаррӯза ба онҳо маоши хуб ва дар иду чорабиниҳо аз ҷониби раиси шаҳр табъи дил подош ҳам мегиранд…

Бахтиёр Юнусов, аз зумраи мутахассисони ҷавони шаҳрдорӣ аст, ки дар ин сафари кӯтоҳ моро ҳамроҳӣ мекард. Мавсуф имрӯз вазифаи муовини директори генералии КВДК «Сарраёсати ободонӣ ва хоҷагии манзилӣ-коммуналӣ»- ро дар шаҳри Хуҷанд ба дӯш дорад. Ӯ дар боби тозакорони шаҳр бисёр бо мамнуният ҳарф зада, онҳоро ҳамчун бонувони бомасъулият баҳо дод. Афзуд, ки онҳо дар оилаю дар маҳалли худ низ чун бонувони тозакору сарфакор соҳиби эҳтироманд.

Бахтиёр шумораи умумии кормандони муассисаро ба беш аз 1000 нафар рақам зад. Дар тобеияти сарраёсат алҳол КД «Истифодабарии манзил-соҳили чап ва рост» (Сирдарё дар назар аст), КД «Истифодабарии роҳҳои Хуҷанд», КДК «Кабудизоркунӣ ва гулпарварӣ»-и Хуҷанд, КВДК «Хизматрасонии нақлиёти санитарӣ-идораи партов» ва КВДК «Хуҷанд-обу канал» шомиланд, ки ҳар кадом дар самти худ ба корҳои ободонӣ, чароғонкунӣ, васлу нигоҳубини фаввораҳо ва кабудизоркунии кӯчаю хиёбонҳои шаҳр фаъолият мебаранд. Сарраёсати ободонӣ дар тули шаш моҳи соли ҷорӣ дар самти тозагию ободонӣ, бунёдкорию созандагӣ ва таъмири намои биноҳои баландошёнаи истиқоматӣ, ки ба тозаву озода нигоҳ доштани шаҳри Хуҷанд нигаронда шудааст, фаъолияти нишонрас намуда, боварии роҳбарони шаҳру вилоятро соҳиб гаштанд. Танҳо аз ҷониби қитъаи «Чароғонкунӣ»-и муассиса ба миқдори 2180 метр ноқилу симҳои барқӣ, 1209 адад лампаю фурӯзонакҳо иваз ва насл шуданд, ки шабона шаҳрро чун рӯз рӯшан нигоҳ медоранд. Пули калони Сирдарё ва пулҳои дигари дохили шаҳр низ дар ин давра бо равшанидиҳандаҳои якметра муҷаҳҳаз шудаанд.

«Истифодабарии роҳҳо»-и шаҳри Хуҷанд аз дигар корхонаҳои давлатии тобеи ин Сарраёсат аст, ки имрӯз таъмиру тоза намудани 318000 метр роҳраву 175863 метр ҷӯйбор ва ду адад пули дохили шаҳрро дар ихтиёр дорад. Заводи хурди асфалтбарории муассиса мунтазам дар фаъолият буда, сари вақт қитъаҳои харобгашта мумфарш мешаванд. Бахтиёр зикр намуд, ки дар таъмири асосӣ ва ҷорӣ, мумфарш намудани роҳҳо баробари истифода аз буҷети вилоят ва шаҳр соҳибкорон низ саҳми арзанда мегузоранд.

Роҳбари ҷавону умедбахш Сарраёсати ободонии шаҳрро бе Корхонаи «Кабудизоркунӣ ва гулпарварӣ», ки бештари зебоии маркази вилоятро дар фаъолияти онҳо мебинад, тасаввур карда наметавонад. Танҳо дар зарфи шаш моҳи соли равон, дар баробари шинондани садҳо ҳазор гули садбаргу пиёзаки гули лола ва дарахтони санавбар, муассисаи мазкур барои шаҳри Душанбе 200 ҳазор гулҳои ҳархела интиқол додааст. Бо роҳбаладии Бахтиёр аз боғу майдони корхонаи мазкур дидан намуда, бо нозукиҳои кори гулпарварон ошно шудем.

Кормандони Сарраёсати ободонии шаҳри Хуҷанд тозагию ободонии маркази вилоятро дар меҳвари фаъолияти доимии хеш қарор дода, баҳри ба ҳадафҳои аслии хеш – созандагию бунёдкорӣ расидан ва сазовор истиқбол гирифтани 35-солагии Истиқлоли давлатии Ҷумҳурии Тоҷикистон аз имконоти мавҷуда васеъ истифода мебаранд.

                                            Рустами НАЗИР,

                                      Душанбе-Хуҷанд-Душанбе