Левакант – шаҳри сабзе дар канори обҳои зулол

Дар ҳошияи амалисозии дастуру супоришҳои Ҳукумати ҷумҳурӣ ҷиҳати ба «кишвари сабз» табдил додани Тоҷикистон имрӯзҳо дар баробари саъю талошҳои дастаҷамъонаи мақомоти маҳаллӣ бо ҷомеаи шаҳрвандӣ дар самти амалисозии барномаи кабудизоркунии ҷумҳурӣ, ҳамзамон, ҷиҳати ҳифзи муҳити зист ва тоза нигоҳ доштани манбаъҳои обҳои мусаффо иқдомҳои наҷибе роҳандозӣ ме- гарданд. Натиҷаи ҳамбастагиву роҳандозӣ намудани ташаббусҳои дастаҷамъонаи масъулин ҷиҳати ҷалби ҷомеаи шаҳрвандӣ ба корҳои обо- дониву сабзкорӣ аст, ки шаҳри Левакант сол аз сол сарсабзу зебо гардида, аз лиҳози тозагии кӯчаву хиёбонҳо ва беҳбудии муҳити зист аз беҳтарин марказҳои маъмурӣ дар вилояти Хатлон ба шумор меравад.

- Роҳбарияти шаҳр бо дарки моҳияти ҷалби таваҷҷуҳи сокинон ба масоили мубрами ҳифзи табиат ва таъмини тозагиву кабудизоркунии муҳити зист, дар ҳар як ҷаласаи корӣ раванди иҷрои нақша - чорабиниҳои самти ташаккули фарҳанги экологӣ, беҳдошти муҳити зист, сари вақт кашондани партовҳо ва фаъолгардонии тамоми қишрҳои ҷомеа ҷиҳати иштирок дар аксияҳои экологиро, мавриди баррасии ҷиддӣ қарор медиҳад, - мегӯяд мудири бахши ҳифзи муҳити зисти шаҳри Левакант Фирӯз Исматов.

Дар доираи иқдомҳои шаҳрдории Левакант во- баста ба беҳдошти муҳити зист, солимгардониву истифодаи самараноки захираҳои табиӣ ва баланд бар- доштани маърифати экологии аҳолӣ, бахши ҳифзи муҳити зисти шаҳр 6 адад қуттӣ барои ҷамъоварии партовҳои пластикӣ ва 2 адад партовгоҳи панелӣ насб гардид. Дар мавсими тирамоҳи соли гузашта ва баҳори соли ҷорӣ бо ҷалби соҳаҳои дахлдор ва фаъолону сокинон дар ҳудуди шаҳр 20 ҳазору 114 бех ниҳоли сояафкану ҳамешасабз ва ниҳолони мевадиҳанда, инчунин 279 ҳазору 977 бех гулу буттаҳои ороишӣ шинонданд.

Фаъолияти назарраси бахши ҳифзи муҳити зисти шаҳр дар самти маърифатнокӣ ва роҳнамоииаҳолӣ ҷиҳати саҳмгузорӣ дар таъмини тозагии хонаву коргоҳ ва маҳали зисташон аз таваҷҷуҳи бевоситаи роҳбарияти Мақомоти иҷроияи маҳаллии ҳокимияти давлатӣ маншаъ мегирад, ки тавассути суҳбату вохӯриҳои гурӯҳҳои таблиғотӣ тамоми қишрҳои ҷомеа, аз ҷумла сокинони корҷӯй ва ҳам бонувони хонашинро ба маъракаи кабудизоркуни- ву тозакориҳои шаҳр сафарбар намуда истодаанд.

Ба андешаи Фаррух Султонов, раиси Ҷамоати шаҳраки Сарбанди шаҳри Левакант, маҳз таъсиси озмунҳои «Хонаи беҳтарин», «Беҳтарин кӯчаи шаҳр», «Маҳаллаи намунавӣ», «Беҳтарин деҳа» ва ғайраҳо шавқи мардумро ҷиҳати саҳмгузорӣ дар сарсабзиву таъмини тозагӣ ва ҳуснороии муҳити шаҳр дучанд намуд, ки рӯз аз рӯз сафи ташаббускорон дар шанбегиҳои дастаҷамъона ва аксияҳои «Тозагии маҳал», «Тозагии соҳил» афзуда истодааст.

- Пӯшида нест, ки аз ҳисоби арзон будани иҷорапулӣ имрӯз теъдоди зиёди оилаҳое, ки дар шаҳру ноҳияҳои атроф фаъолият доранд, шаҳри Сарбандро сукунат ихтиёр мекунанд. Аз ин лиҳоз, бо мақсади баланд бардоштани маданияти шаҳрдорӣ ва ҳисси масъулиятшиносии шаҳрвандон дар ҳифзи муҳити зист ва таъмини тозагӣ дар шаҳр, сокинони иҷоранишин ҳам дар таъмини тозагии хонаву атро- фи бинои истиқоматӣ ва маҳали зисташон муваззаф мебошанд. Дар ин баробар, кормандони корхонаи коммуналии шаҳри Левакант кӯчаву хиёбонҳоро аз партовҳо тоза менамоянд ва гурӯҳҳои ташаббускор зимни суҳбату вохӯриҳо бо аҳолӣ баррасии масъалаи тозагии шаҳрро дар мадди аввал мегузоранд,- иброз дошт раиси Ҷамоати шаҳраки Сарбанд.

Дар раванди иқдомҳои ободониву зебогардонӣ ва ба шаҳри сабзу беҳтарин минтақаи сайёҳӣ табдил ёфтани ин маъвои сароби рӯдхонаҳои водии Вахш, бонувон нақши пешоҳангӣ доранд. Ба иқрори Боғигул Эшова, мудири бахши кор бо занон ва оилаи МИМҲД шаҳри Левакант, аз ҳайати 128-нафараи фаъолони шаҳр, ки иборат аз 26 гурӯҳи таблиғотӣ бо усули «Хона ба хона» бо сокинон суҳбату вохӯриҳо мегузаронанд, аксариятро бонувон ташкил медиҳанд.

Давоми нимсолаи аввали соли ҷорӣ фаъолза- нони шаҳр дар коргоҳу ташкилотҳо ва маҳаллаву деҳкадаҳо 97 маротиба вохӯриҳо доир намуданд. Зимни ин гуна чорабиниҳои фаҳмондадиҳӣ дар радифи дигар масоили иҷтимоӣ, ҳамчунин, занону духтарони хонашинро ба маъракаҳои ободониву кабудизоркунии кӯчаву хиёбонҳо саҳмгузорӣ ҷиҳати пешгирӣ аз ифлосшавии манбаъҳои обӣ ва иштироки фаъолона дар ҳамоишу чорабиниҳои тозагии муҳити зист даъват бинмудаем. Коргарзанони шаҳри мо, ки имрӯз шумораашон ба 27 ҳазору 191 нафар мерасад, дар баробари кору пайкори шоиста дар зинаҳои роҳбарӣ ҳам бо ташаббускориҳои наҷиб дар татбиқи сиёсати экологӣ ва барномаву тадбирҳои масири беҳдоштии муҳити зист, таъмини тозагии табиат ва ҳифзи сарватҳои табиӣ нақши меҳварӣ мебозанд. Имрӯз қишри аъзами кормандони соҳаи коммуналӣ, КИ ҲХДТ дар шаҳри Левакант ва дигар соҳаҳоро, ки дар аксияҳои экологӣ фаъолона иштирок менамоянд, бонувон ташкил медиҳанд. Маҳз бо ҳамовозиву ташаббускориҳои ватандӯстонаи занону духтарони хонашин, имрӯзҳо мо дар пешгирӣ ва бартарафсозии партовҳои пластикӣ дар рустоҳои деҳоти Гулистон ва Ваҳдати шаҳрамон муваффақ шуда истодаем. Тибқи дастуру тавсияи мутахассисони соҳа ҳамакнун дар ҳудуди заминҳои наздиҳавлигии манзилҳои истиқоматии деҳот ду адад чоҳҳо барои партовҳои маишӣ ва партовҳои полиэтиленӣ омода карда шудааст. Сокинони деҳкадаҳои шаҳри Левакант чоҳҳои барои партовҳои маиширо баъди коркард ҳамчун ғизои иловагӣ дар қитъаҳои корам истифода мебаранд ва партовҳои полиэтилениро бошад дар чоҳҳои наздиҳавлиги худ безарар мегардонанд. Дар ҳудуди шаҳраки Сарбанд бошад, партовҳои пластикӣ дар қуттиҳои махсуси сарироҳӣ ҷамъ оварда шуда, аз он ҷо тавассути техникаи боркашонӣ ба партовгоҳи умумӣ интиқол дода мешавад, - мегӯяд Боғигул Эшова.

Хулоса, дар доираи татбиқи Барномаи давлатии миллии «кишвари сабз»-и Тоҷикистон барои солҳои 2023–2027 ва Барномаи давлатии кабудизоркунии Ҷумҳурии Тоҷикистон барои давраи то соли 2040, дар баробари иқдомҳои пешгирифта дар самти таъмини тозагии муҳит ва пешгирӣ аз ифлосшавии манбаъҳои обӣ, ҳамзамон, ҳар сол дар мавсими ниҳолшинонӣ дар ҳудуди шаҳри Левакант ҳазорон бех ниҳолони сояафкану ороишӣ ва мевадиҳанда, гулу буттаҳои ороишӣ шинонда мешаванд.

                                         Ҷамолиддин САЙФИДДИН,

                                                  шаҳри Левакант