Аз ҳазор яке…

Ноҳияи Варзоб бо мавзеъҳои сайёҳии худ машҳури олам аст. Дар нашри навбатии хатсайри мо ин ноҳияи зебои диёр буд. Варзоб дар қалби дараи рӯди Варзоб ҷойгир буда, аз шаҳри Душанбе дар масофаи 25 км воқеъ аст. Тибқи маълумоти Мақомоти иҷроияи маҳаллии ҳокимияти давлатии ноҳияи Варзоб дар ин ҷо 1000 минтақаи истироҳатӣ ба қайд гирифта шудааст, ки аз ин миён фаъолияти 110 истироҳатгоҳи оммавӣ мавсимӣ мебошад. Фаъолияти иншооти муҳими сайёҳӣ, мисли «Кохи Малика», «Варзоб-Палас», «Гулобод», «Гули майда» ва Маҷмааи лижаронии «Сафеддара» доимист. Ин истироҳатгоҳҳо барои қабули сайёҳони дохилӣ ва хориҷӣ тамоми шароитҳои замонавиро доранд.

Ҳамчунин, дар ноҳия ёдгориҳои таърихӣ, осоишгоҳҳои Хоҷа Оби Гарм, «Сароб» ва пансионати «Харангон» фаъолияти доимӣ доранд, ки барои табобат ва истироҳати меҳмонони дохилӣ ва хориҷӣ тамоми шароитҳои муосир бо хизматрасониҳои замонавӣ фароҳам шудаанд.

Дар замони ҳозира соҳаи сайёҳӣ мавқеи махсусеро дорост, ки дар самти рушди иқтисоди миллии кишварҳои ҷаҳон нақши басо бузург мебозад. Мувофиқи маълумоти оморӣ, даромади умумӣ аз ҳисоби сайёҳии байналмилалӣ дар сатҳи ҷаҳон ба 1,5 триллион доллари ИМА расидааст. Тоҷикистон низ ба соҳаи сайёҳӣ, таъмин намудани шароити мусоиди ҳуқуқӣ барои ташкили фаъолияти самарабахши субъектҳои фаъолияти сайёҳӣ имкониятҳои хуберо рӯйи кор овардааст.

Минтақаи истироҳатии «Навои Варзоб» яке аз гӯшаҳои зебои диёр ба ҳисоб рафта, тайи 7 сол мешавад, ки барои қабули меҳмонони дохиливу хориҷӣ пайи кор аст. Ин макон ба тарҳи миллӣ эъмор дода шуда, рӯйи хонро ғизову хӯришҳои миллӣ зеб медиҳанд. Зубайдулло Бобоев, роҳбари «Навои Варзоб» аз сатҳу сифати ин самти соҳибкорӣ розӣ буда, иқрор омад, ки бо зиёд шудани чунин нуқтаҳои сайёҳӣ чанд нафар соҳиби кор мешавад. Соҳибкор ният дорад, ки то Ҷашни 35-солагии Истиқлоли давлатӣ як коргоҳи оббарориро дар ноҳияи Варзоб рӯйи кор бигирад, ки дар он сафи коргарон то 50 нафарро фарогир бошад…

Тараққӣ додани соҳаи сайёҳӣ барои Тоҷикистон омили муҳимтарин аст. Дар бозори ҷаҳонии сайёҳӣ Ҷумҳурии Тоҷикистон мавқеи намоёнро молик аст, аммо он мутобиқ ба ҳиссаи кишвар қисми гардиши сайёҳии ҷаҳонӣ ночиз аст. Барои рушди минбаъдаи иқтисодиёти ноҳияи Варзоб соҳаи сайёҳӣ нақши муҳим дошта, он яке аз соҳаҳои афзалиятнок ва муҳим ба ҳисоб меравад. Ба ноҳия аз ИДМ, кишварҳои назди Балтик ва дигар давлатҳои хориҷӣ, сайёҳони зиёд меоянд.

Аҳолии ноҳияи Варзоб ба мафҳуми рушди сайёҳӣ хуб сарфаҳм рафта, сатҳу сифати хизматрасониро ба сайёҳон сол ба сол беҳтар менамояд. Дар ҷамоатҳои шаҳрак ва деҳот марказҳои тиҷоратӣ, ошхонаҳо, меҳмонхонаҳо ва нуқтаҳои фурӯши сӯзишворӣ барои хизмат расондан ба меҳмонону сайёҳон пайваста омодаанд.

Мувофиқи нишондиҳандаҳои оморӣ сайёҳӣ сол ба сол тамоюли устувори баландшавӣ дошта, ба муътадилии вазъи иҷтимоию иқтисодии кишвар мусоидати бештар менамояд. Дар ояндаи наздик дар ин ҷо намудҳои афзалиятноки сайёҳӣ, мисли кӯҳнавардӣ, пиёдагардии кӯҳию варзишӣ ва экологӣ, аспсаворӣ, автомобилӣ, табобатӣ, санаторию курортӣ ва истироҳатӣ, сайёҳии касбӣ, таърихию омӯзишӣ ва этнографӣ, рафтинг (қаиқронӣ дар дарёҳои кӯҳӣ), лижаронии кӯҳӣ ва ғайра дар назар аст.

Дар ҳудуди ноҳия иншооти гуногуни фароғатӣ, дараҳои зебои мафтункунанда ва дорои гиёҳҳои шифобахшу дарёчаҳои шӯхи Кондара, Ғусғарф, Харангон, Очук, Такоб, Зидеҳ, Сиёма, Майхӯра, Лучоб ва Чорбоғ мавҷуд буда, зебоии онҳо қалби дилхоҳ меҳмонони дохилию хориҷиро тасхир менамоянд. Дар ин дараҳои тамошобоб роҳи мошингард ва пайраҳаҳои сайёҳӣ мавҷуданд ва мавзеъҳои тамошобобу фароғатӣ барои ҷалби хориҷиён мебошанд…

Бинобар андешаи мутахассисон, дар ҳолати дуруст ба низом даровардани рушди сайёҳӣ дар мамлакат, ин соҳаи манфиатнок метавонад дар солҳои наздик 25 дарсади даромади Тоҷикистонро таъмин намояд.

Тоҷикистон тибқи назарсанҷии маҷаллаи байналмилалии бонуфузи «Lonely Planet» байни 10 минтақаи беҳтарини саёҳат ва сафар ба Шоҳроҳи абрешими Осиёи Марказӣ дар мақоми аввал қарор дорад.

Маҷаллаи сайёҳии бритонии «Вандерласт» («Wanderlust») Ҷумҳурии Тоҷикистонро дар қатори 10 кишвари ҷолибтарин барои боздиди сайёҳон эълон доштааст. Маҷаллаи байналмилалии «Financial Times» Ҷумҳурии Тоҷикистонро ба рӯйхати ҳашт кишваре ворид намуд, ки ба сайёҳон барои боздид тавсия мешавад…

Сафари мо ба ин ноҳияи зебои кӯҳии шафати пойтахт бисёр ҷолибу хотирмон буд. Кишвари мо дар самти рушди сайёҳӣ қадамҳои устуворро гузоштаасту дар ояндаи наздик гардишгарони зиёде ба Тоҷикистони офтобии мо, аз ҷумла дараи Варзоб ташриф меоранд…

                                                      Фарзона ВОСЕЕВА,

                                            Душанбе - Варзоб - Душанбе