Дар истиқболи навзод

Садои гиряи тифлакон мисли хори умумӣ толори шуъбаи модар ва кӯдакро пур кардааст. Модарони ҷавон бо беқарорӣ аз Нодираапа, ки беш аз сӣ сол аст, рози ниҳони ин садоҳоро медонад, маслиҳат мепурсанд.

Бо тамкини ба худ хос ба ҳар ҷавонмодаре тавсияи заруриро дода, то саранҷоми кори худро ёфтани модар, тифли ӯро дар оғӯши меҳрбораш оромӣ мебахшад.

- Ҳар боре чашмони умедвори модаре бо шунидани нахустин гиряи тифл равшан мешаванд, дар дилам меҳри беохире ҷӯш мезанаду аз касбам ифтихор мекунам. Касбе, ки орзуи деринам буду аз он ному нон меёбам. Хонаамон дар шафати бемористон буду ба табибон ҳамеша бо ҳавас менигаристам. Модарам чун ҳамшираи шафқат дар миёни ҳаммаҳаллаҳо маҳбубият доштанд, аммо ман мехостам табиб шавам. Духтури дараҷаи олӣ, - ба суҳбат оғоз мекунад момодояи калони шуъбаи таваллуди беморхонаи марказии ноҳияи Варзоб, Нодира Бӯриева.

Нодира замоне мактаби миёнаро хатм кард, ки Тоҷикистон тоза соҳибистиқлол шуда буду душманони дохиливу хориҷӣ аз ҳар тараф теша ба решаи давлат мезаданд. Орзуҳои ширини ин духтараки кӯҳистонӣ мисли дигар ҳамсолонаш дар панҷаи ҷанги таҳмилии шаҳрвандӣ фишурда шуданд, вай пас аз ба эътидол омадани вазъ ҳуҷҷатҳояшро ба Омӯзишгоҳи тиббии шаҳри Душанбе супурд. Баъди хатми Омӯзишгоҳ, соли 1994 фаъолиятро дар шуъбаи таваллуди беморхонаи марказии ноҳияи Варзоб оғоз кард.

Вақте нахустин нидои ҳаётро мешунавад ва бо дастони пур аз меҳр меҳмони навро истиқбол мегирад, ёд меорад он моҳҳои аввали кориро, ки аз гиряи беохири тифлону ҳолати душвори модарон хаставу дилгир мешуд:

- Солҳое, ки тоза ба фаъолияти ҳамширагӣ оғоз карда будам, корамон беҳад душвор буд. Табибони касбӣ намерасиданд. Ҳуҷраҳо ба меъёрҳои маъмулӣ ҷавобгӯ набуданду модарон аз омадан ба беморхона метарсиданд. Аксарият дар хона таваллуд карданро авлотар медонистанд. Бебарқиву бемаошӣ, набудани техникаҳои ёрирасон ва нооромиҳо боис мешуданд, то табибони таҷрибадор тарки пеша намоянду барои пайдо намудани қути лоямут ба корҳои дигар рӯ оранд, - ёд аз солҳои аввали фаъолият мекунад Нодира Бӯриева.

Ба шарофати соҳибистиқлолӣ ва ҳамдиливу ваҳдату ягонагӣ дар баробари дигар соҳаҳои муҳими ҳаёт, соҳаи тандурустӣ низ рушд кард. Бемористонҳои муҷаҳҳаз бо техникаҳои ёрирасони тиббӣ, табибони донишанд ва шароити мусоиди корӣ имкон фароҳам оварданд, ки момодоя низ дар кори худ мумтоз гардад. Таҷрибаи дар душвориҳо омӯхтаашро ба кор бурду ҳамчун момодояи сабукдаст маҳбуби корафтодагон гардид. Мегӯянд, ки аксари кӯдакони Варзоб дар рӯйи дастони ӯ дунёи равшанро дидаанд.

      Шуъбаи таваллуд яке аз бахшҳои муҳими фаъолияти беморхонаи мазкур ба ҳисоб меравад, ки аз соли 2002 дар хизмати модару кӯдак ва аҳолии ноҳия қарор дорад. Мутахассисони соҳибтаҷриба, 6 акушер-гинеколог, 4 момодоя ва 4 корманди миёнаи тиб шабонарӯзӣ ба занони ҳомила хизмат мерасонанд, - мегӯяд Насиба Ҷобирова, ки аз соли 2014 мудирии шуъбаро ба уҳда дорад. 

Шуъбаи таваллуд солҳост ҳамчун такягоҳи боэътимоди модарону кӯдакон шинохта шудааст. Ҳуҷраҳои таваллуд, як ҳуҷраи прэклампсия, ҳуҷраҳои хатна ва навзод, ҳуҷраҳои модару кӯдак бо тамоми техникаҳои тиббиву ёрирасон муҷаҳҳазанд. Натиҷаи меҳнати софдилонаи кормандони соҳаи тандурустӣ боис шуда, то сол аз сол бовари мардум ба таваллудгоҳ дубора барқарор шаваду ҳолати фавт коҳиш ёфта, насли солим ба дунё ояд.

- Солҳои пеш, агар занон таваллуди хонагиро афзалтар донанд, имрӯзҳо пурра ба таваллудгоҳ рӯ овардаанд. Аз 548 таваллуде, ки дар нимсолаи аввали соли 2025 ба қайд гирифта шуд, танҳо 5 зоиши хонагӣ буд. Боло рафтани маърифати тиббии аҳолӣ ва огоҳии бештар доштани занони ҳомила дар бораи вазъи саломатиашон, кори табибони соҳаро осон кардааст, - илова мекунад мудири шуъба.

Умдатарин масъалаҳое, ки боиси нигаронии кормандони шуъбаи таваллуди ноҳия аст, майли аз ҳад зиёди модарони ҷавон ба буруши қайсарӣ ва розӣ нашудан ба хатна аст. Табибон баъди қабули беморон ва ташхису муоинаи онҳо ҳолати сиҳатиашонро ба инобат гирифта, бо роҳи табиӣ таваллуд карданро маслиҳат медиҳанд ва аз хатару оризаҳои буриши қайсарӣ онҳоро огоҳ месозанд. Бо вуҷуди ин, даҳ дарсади муроҷиаткунандагон ҷарроҳиро афзалтар медонанд.

- Аз рӯйи ташхису муоина ва шиносоӣ бо варақаи зани ҳомила аз тарафи табибон то чӣ андоза зарур будани таваллуд бо роҳи ҷарроҳӣ муайян карда мешавад. Бо роҳи гузарондани корҳои фаҳмондадиҳӣ аксари онҳо ба таваллуди табиӣ розӣ мешаванд, ки ин ба саломатии худи модар муфид аст. Бо вуҷуди ин, соли равон 34 кӯдак бо роҳи бурриши қайсарӣ ба дунё омад, ки модарони онҳо аз ҷиҳати сиҳатӣ воқеан ба таваллуди табиӣ омода набуданд, - мегӯяд момодоя Нодира Бӯриева.

Маврид ба зикр аст, ки шуъбаи таваллуди беморхонаи марказии ноҳияи Варзоб ҳамчун яке аз муассисаҳои муҳими тандурустии маҳаллӣ, нақши арзишманд дар таъмини солимии модарону кӯдакон дорад. Ҳамкории самараноки кормандони шуъба бо дигар бахшҳои беморхона, бунгоҳҳои тиббии 7 ҷамоати деҳот, мақомоти соҳаи тандурустӣ, инчунин диққати махсус ба омӯзиш ва такмили малакаҳои касбӣ, асоси муваффақияти шуъбаи таваллуд маҳсуб меёбад. Шуъба имрӯз ҳамчун як паноҳгоҳи умед ва зиндагии нав барои ҳазорон модар ва кӯдак хизмат мекунад. Талошҳои софдилонаи мутахассисон, аз ҷумла момодояи таҷрибадор Нодира Бӯриева, намунаи олии садоқат ба вазифа ва меҳри инсонӣ мебошад ва ҳаёти нав бо меҳру муҳаббат истиқбол гирифта мешавад.

                           М.НАЗИРОВА,

                    Душанбе-Варзоб-Душанбе