25 май – рӯзи ҷаҳонии футбол

Бо кӯшиши Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Ассотсиатсияи Футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ тариқи қабули Қатъномаи махсуси Маҷмаи Умумии Созмони Милали Муттаҳид 25-уми май ҳамчун Рӯзи ҷаҳонии футбол расман эълон гардид. 

Ин падидаи варзишӣ аз ҷониби аҳли олам, ки футболро ҳамчун фарҳанги умумиҷаҳонӣ шинохтааст, гарму самимӣ истиқбол шуд. Соли дуюм аст, ки на танҳо дар Тоҷикистон, балки аз ҷониби ФИФА дар саросари ҷаҳон аз 21-ум то 25-уми май чорабиниҳои Ҳафтаи ҷаҳонии футбол ба таври густурда доир мегарданд.