Академияи футболи «Истиқлол»

Пас аз ба даст овардани соҳибистиқлолӣ дар Тоҷикистон 25- уми декабри соли 1991 Федератсияи футболи Тоҷикистон ҳамчун ташкилоти ҷамъиятии «Федеросиюни футболи Тоҷикистон» барқарор шуд. Соли 1994 ба узвияти Федератсияи ҷаҳонии футбол (ФИФА) ва Конфедератсияи футболи Осиё ҳамчун намояндаи давлати соҳибихтиёр пазируфта шуд.

5-уми январи соли 2012 Рустами Эмомалӣ ба мақоми Президенти Федератсияи футболи Тоҷикистон интихоб шуданд ва шуруъ аз ҳамон сол футбол дар Тоҷикистон рушд намуда, дар шакли бесобиқа пешрафт кард.  

«Ҳадаф: тарбияи инсони комил»

Моҳи марти соли 2012 аз ҷониби дастаи «Истиқлол» аввалин Академияи футбол дар Тоҷикистон дар шаҳри Ҳисор таъсис ёфт. Алҳол, дар Академия, ки дар шаҳраки Алмосии шаҳри Ҳисор амал мекунад, наврасони болаёқати синни аз 12 то 16-сола аз тамоми минтақаҳои ҷумҳурӣ ба таълим ва, ҳамзамон, омӯзиши нозукиҳои футбол ҷалб гардидаанд. Гуфта мешавад, ки варзишгарони ояндадор ба рӯйхати захираҳои даста шомил гардида, беҳтаринҳо дар оянда дар ҳайати мунтахаби Тоҷикистон бозӣ мекунанд.

 Ба хотири дидан намудан аз шароити будубоши футболбозони навраси Академияи футболи дастаи «Истиқлол» роҳ сӯйи шаҳри Ҳисор пеш гирифтем. Чизе, ки таваҷҷуҳи моро бо ворид шудан ба Бошгоҳи футболи дастаи «Истиқлол» ба худ кашид, садои Суруди миллии Тоҷикистон буд, ки аз ҷониби футболбозони ду даста, дастаҳои футболи «Истиқлол» ва «Барқчӣ-2» суруда мешуд. Ду даста бо ҳам бозии дӯстона дошт…

Нуриддин Давронов, собиқ бозингари дастаи «Истиқлол» ва бозингари тими мунтахаби Ҷумҳурии Тоҷикистон, ки директори Академияи футболи дастаи «Истиқлол» таъин гардидааст, аз дастовардҳои футболбозони тоҷик изҳори қаноат намуда, мегӯяд:

- Баробари Президенти Федератсияи футболи Тоҷикистон интихоб гардидани муҳтарам Рустами Эмомалӣ соҳа ба маротиб пеш рафт. Ширкати футболбозони тоҷик дар бозиҳои байналмилалӣ ва ноил гардиданашон ба дастовардҳои бузурггувоҳи он аст, ки воқеан футболи тоҷик дар хатти муваффақиятҳо қарор дорад. Боиси хушнудист, ки дастаи футболи «Истиқлол» ба Лигаи қаҳрамонҳои Осиё роҳхат гирифт ва аз натиҷаҳои хубу назаррасе умед дорем.

Нуриддин Давронов, яке аз бозингарони номвари тоҷик аст, ки нозукиҳои футболро дар Мактаб-интернати футболи шаҳри Мински кишвари Беларус аз бар намуда, дар муқоиса бо солҳои пеш ёдовар мешавад, ки имрӯз барои футболбозон ва рушди футбол дар кишвар тамоми шароитҳо муҳайёанд.

- Дастрасӣ надоштан ба имконот ва набуди шароити вақт водорам сохт, то дар берун аз Ватан тамрини футбол намоям. Имрӯз шароити фароҳамомада дар ҷумҳурӣ имкони хуби тарбияи истеъдодҳоро дар самти футбол медиҳад, ки бояд аз он дуруст истифода намоем. Ба хотири дарёфти бачаҳои болаёқат, ба шаҳру навоҳии кишвар сафарҳо мекунем ва, хушбахтона, дар пайдо кардани истеъдодҳои футбол як андоза муваффақ ҳам шудем. Барои ҷалби ҷавонон ба Академия, пеш аз ҳама, истеъдоди футболбозӣ, қаду қомати мувофиқ ва чусту чолокии бачаҳо ба инобат гирифта мешаванд, - иброз медорад Нуриддин Давронов.

Имрӯз дар Академияи футболи дастаи «Истиқлол» 27 нафар футболбози наврас ба машқҳои доимӣ фаро гирифта шудааст. Бачаҳо, дар баробари синфхонаҳои барҳаво, ки бо лавозимоти замонавии таълимӣ муҷаҳҳазанд, аз барномаҳои пешрафтаи тадрис баҳраваранд. Роҳбарияти Академия нисбат ба омӯзиши забонҳои хориҷӣ, аз ҷумла забонҳои русӣ ва англисӣ таваҷҷуҳи хоса зоҳир намуда, барои донишандӯзии хонандагон дар сатҳи олӣ шароит фароҳам овардаанд.

«Футбол ҳамчун маҳсули эҷоди тафаккури инсонӣ аз як бозии одӣ ба омили пайвандгари инсоният табдил ёфтааст»

                                                                   Рустами Эмомалӣ

Академия дорои ҳуҷраи табибон, хобгоҳ ва маҷлисгоҳ буда, таълимгирандагон дар баробари таҳсил, тамрин ва гузарондани лаҳзаҳои фароғатӣ, чор вақт хӯроки серғизоро аз ошхонаи Академия истеъмол менамоянд.

- Барои таълимгирандагони Академияи футболи дастаи «Истиқлол» тамоми хизматрасониҳо ройгон аст ва ҳар навраси болаёқату соҳибистеъдод имкони шомил шудан ба ин даргоҳро дорад. Шумораи зиёди бозингарони дастаи «Истиқлол» аз оилаҳои камбизоатанд ва ба хотири доштани истеъдоди баландашон дар ин намуди варзиш ба даста ҷалб шудаанд. Академия омода аст, ки бозингарони навро ба дастаи «Истиқлол» ҷалб созад. Наврасону ҷавонон нахуст барои бозӣ дар дастаи мунтахаби футболи кишвар омода мешаванд. Баъдан, онҳое, ки имкон пайдо менамоянд, метавонанд, дар тимҳои гуногуни кишварҳои хориҷ бозӣ кунанд.

Дар Академия ғайр аз таълимгирандагони доимӣ ду гурӯҳи футболбозони наврас аз гирду атрофи шаҳри Ҳисор барои омӯзишу тамрин ҷалб шудаанд.

- Пеш аз дарёфти футболбозони беҳтарин, мо нахуст дар хусуси тарбияи инсони комил бояд биандешем ва барои расидан ба ҳадаф талош меварзем. Риояи тартибу низом, одобу ахлоқ, эҳтироми калонсолон, арҷ гузоштан ба арзишҳои миллӣ ва ба муқаддасоти Тоҷикистон, аз мавзуъҳоеанд, ки ҳар рӯз ба муҳассилон тарғиб мешаванд, - мегӯяд директори Академияи футболи дастаи «Истиқлол».

 Таваҷҷуҳ ба футбол меафзояд

Бо пазируфта шудани пешниҳоди Президенти Федератсияи футболи Тоҷикистон муҳтарам Рустами Эмомалӣ дар Созмони Милали Муттаҳид ва эълон гардидани санаи 25-уми май ҳамчун Рӯзи ҷаҳонии футбол обрӯи кишвар байни давлатҳои сайёра афзуд.

- Президенти Федератсияи футболи Тоҷикистон муҳтарам Рустами Эмомалӣ супориш доданд, ки ба хотири дастгирии ин намуди варзиш, яъне рушди футболи тоҷик дар вилоятҳои Суғду Хатлон ва Вилояти Мухтори Кӯҳистони Бадахшон чунин академияҳо таъсис дода шавад. Агарчи дар ҳар минтақаҳои кишвар мактабҳои футбол фаъолият менамоянд, ба хотири фаро гирифтани истеъдодҳо дар маҳал соли оянда дар ду вилояти ҷумҳурӣ чунин академия ба кор шуруъ хоҳад кард.

Бо супориши президенти Бошгоҳи дастаи «Истиқлол» Шоҳрух Саидзода дар Академияи футболи дастаи «Истиқлол» аз ҳисоби духтарони болаёқат ва соҳибистеъдод таъсис додани як дастаи футболи занона дар назар аст. Рӯзҳои наздик дастаи футболи «Истиқлол» соҳиби як дастаи футболи занона мегардад, - бо хушнудӣ гуфт Нуриддин Давронов.

Ба хотири рушди футбол ва дастгирии футболбозони наврас Академияи мазкур ҳамкориро бо мураббиёни номвар ва, ҳамчунин, бо мутахассисони варзида ва таҷрибаандӯхтаи хориҷи кишвар, ки дар самти футбол маъруфанд, роҳандозӣ намудааст. Имрӯз мураббии испанӣ Кладио Гарсия Лара ба футболбозони навраси дастаи «Истиқлол» маҳорати футболбозӣ меомӯзад.

Дар интиҳои суҳбат Нуриддин Давронов зикр кард, ки дар баробари мутахассисон, омӯзгорони варзида, ки дар таълим ва тарбияи футболбозони тоҷик саҳм мегиранд, мебоист дар кишвар табибони варзишӣ низ дар ин ришта омода шаванд, зеро имрӯз варзиши тоҷик, бахусус самти футбол, ба пизишкони касбӣ ниёзманд аст. Алҳол, дар дастаи футболи «Истиқлол» Фаррух Авезов ҳамчун табиби варзишии касбӣ фаъолият менамояд.

                                                                                                  Қутбия НЕЪМАТУЛЛО