Варзишкори муваффақ

Узви шуъбаи хидматрасонӣ ба шахсони имконияташон маҳдуди Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон Насиба Маҳмадова соли 2025 дар Олимпиадаи махсуси ҷаҳонӣ (Special Olympics International) дар шаҳри Турини Итолиё дар риштаи лижаронӣ сазовори медали тилло гардид.

Барои ин ӯ 4 ҳафта дар «Сафеддара» бо устодонаш тамрин кард, заҳмат кашид. Ин муваффақияти бузург барои Насиба буд. Насибае, ки ҳатто мактаби миёнаро бо сабаби беморӣ хатм накардааст, дар Special Olympics International, ки ба баргузор намудани маҳфилҳои варзишӣ барои шахсони имконияташон маҳдуд машғул аст, 2 маротиба сазовори ҷойҳои якуму дуюм гардид.

Бори аввал соли 2018 дар шаҳри Абудабии Амороти Муттаҳидаи Араб дар варзиши сабук: давидан сазовори ҷойи дуюм ва бори дуюм соли 2025 дар шаҳри Турини Итолиё дар лижаронӣ сазовори ҷойи аввал шуд.

Комёбиҳои Насиба Маҳмадова дар соҳаҳои гуногун кам нестанд. Дар семинару давраҳои омӯзишии ватаниву хориҷӣ ва маҳфилҳои бисёр ширкати фаъолона дорад, ҳамчунин, гули сари сабади маҳфилу нишаст ва барномаҳои шуъбаи хидматрасонӣ ба шахсони имконияташон маҳдуди Китобхонаи миллӣ аст. Борҳо рақсашро дар маҳфилҳо дида гумон кардам, усулҳои рақсро пеши устоде ё ягон омӯзишгоҳе омӯхтааст. Модари Насиба Сабохон Маҳмадова гуфт, ки ҷойе дарси рақс нагирифтааст, худаш истеъдоди раққосӣ дорад.

Ба гуфти модар, Насиба бо синдроми Дауна ба дунё омад. Табибон ба волидонаш гуфтанд, ки фарзандашон зинда намемонад, тавсия доданд аз баҳраш гузаранд ё ӯро ба ятимхона супоранд, вале онҳо розӣ нашуданду аз пайи тарбия гаштанд.

Насиба 3 сол вазн нагирифт, модар ӯро назди табибони сершумор бурд, ҳар тамрину давоеро, ки тавсия медоданд, иҷро мекард.

Насиба чун ба синни мактабӣ расид, ӯро ба мактаб бурданд, вале бино ба суханони модараш, дар он солҳои пасошуравӣ дастгирӣ набуд. Ҳама ба фикри худ. Ҳамин шуду ӯ аз мактаб монд. Модар афсӯс мехӯрад, ки духтарашро ба интернат набурд, вагарна хондану навиштан ва касбу ҳунареро меомӯхт. «Дилам нашуд»,- мегӯяд ӯ.

Паҳлавони тоҷик Дилшод Назаров дар Варзишгоҳи марказии ҷумҳуриявии Душанбе кор мекард. Насиба низ дар ин ҷо ба варзиш машғул мешуд. Замоне, ки гурзандоз дар бозиҳои олимпӣ дар шаҳри Рио-де-Жанейро қаҳрамон шуд, Насиба гуфт: «Ту қаҳрамон шудӣ, ман ҳам мешавам». Ва шуд! На 1 бор.

Пеш аз ширкат дар ин олимпиадаи бонуфузи ҷаҳонӣ дар шаҳри Абудаби, соли 2018 Насиба Маҳмадова бо модари Дилшод Назаров, ки муррабияш буд, як ҳафта тамрин кард.

Насиба Маҳмадова ҳоло ҳам дар Қасри теннис ҳафтае то 2 маротиба тамрин мекунад.

Беш аз 2 моҳ аст, ки дар созмони «Муосир», ки сарвараш Адолат Хуҷамқулова аст, курси ройгони ҳунарҳои мардумиро меомӯзад ва аллакай ороиши мӯй, сохтани сумкачаҳои занонаву дастбандҳои зебо ва ҳар гуна гулҳои аҷиби муҳрагин ва дигар ҳунарҳои дастиро омӯхтааст. Ӯ метавонад аз ҳисоби фурӯши маҳсулоти дастӣ пул ба даст биёраду зиндагиашро пеш барад.

                                                                 Раҳима АЪЗАМ